क्यङनाम मल्टिकल्चरल फेमिली फेस्टिभल सम्पन्न
फोनिज कोरिया सम्वाददाता
छाङवन विश्वविद्यालयको परिसरमा रहेको खेलमैदान, शनिबार विभिन्न मुलुकबाट विवाह गरेर आएका दिदीबहिनीको परिवारसहित कोरियन नागरिकहरुको बाग्लो उपस्थितिले खेलमैदान झकिझकाउ देखिन्थ्यो । हरेक वर्ष घ्यङसाङनाम्दोले आयोजना गर्दै आएको क्यङनाम मल्टिकल्चरल फेमिली फेस्टिभलमा घ्यङसाङनाम्दोमा रहेका दर्जन भन्दा बढी बहुसाँस्कृतिक सहायता केन्द्र (धामुन्ह्वा सेन्टर)को सहभागिता रहेको थियो ।
बिहान ११ बजेदेखि बेलुकी ४ बजेसम्म भएको उक्त फेस्टिभलमा विभिन्न मुलुकको संस्कृति झल्कने भेषभूषा र झण्डासहित सहभागि विदेशी महिलाहरुले आआफ्नो प्रस्तुति पस्केका थिए । कार्यक्रममा धामुन्ह्वा बालबालिकाहरुसहित विभिन्न मुलुकका प्रतिभाशाली महिलाहरुको आकर्षक नृत्य सहित विभिन्न गीत तथा खेलहरु प्रस्तुत गरिएको थियो ।
त्यसैगरी कार्यक्रम स्थलमा राखिएका विभिन्न स्टलहरुमा थाइल्याण्ड र कम्बोडियाको परम्परागत खानाकासाथमा भियतनाम र नेपालको कफि समेत राखिएको थियो । त्यस्तै बालबालिकाहरुका लागि विभिन्न खेल, फेस पेन्टिङ तथा नेल पेन्टिङ, फोटोलगायतका आकर्षक स्टलहरु राखिएका थिए ।
कार्यक्रममा कोरियाका चर्चित गायकगायिकाहरुले पनि गीत प्रस्तुत गरेर उपस्थित दर्शक तथा सहभागीलाई मनोरञ्जन प्रदान गरेका थिए । त्यस्तै कोरियाको परम्परागत खेल तेक्वन्दो र सिरमका साथमा फ्रि डान्स परफमेन्सका साथमा साइकलसहित थुप्रै आकर्षक भाग्यशाली चिठ्ठा उपहार समेत प्रदान गरिएको थियो ।
