कोरियामा मृतक डांगी र लिम्बुको चार संस्थाले संयुक्त श्रद्धाञ्जलीसभा गर्ने
फोनिज कोरिया संवाददाता
सउल
दक्षिण कोरियामा गत हप्ता निधन भएका व्यवसायी, साहित्यकर्मी र समाजसेवी मनोज डाँगी र इपिएस मार्फत कोरिया आएका दूधराम लिम्बुको यही आइतबार सउलमा श्रद्धाञ्जली सभा गरिने भएको छ ।
सउलको दोम्योआफ स्थित नेपालीहरुको साझा घर नेपाल हाउसमा गरिन लागेको श्रद्धाञ्जलीसभालाई कोरियामा रहेको चार संस्था ग्लोबल तेह्रथुम सेवा समाज, किराँत याक्थुम चुम्लुइ०, संखुवासभा सम्पर्क समिति र अन्तराष्ट्रिय नेपाली साहित्य समाजले संयुक्तरुपमा गर्ने भएको हो ।
मृतक मनोज डांगी अन्तराष्ट्रिय नेपाली साहित्य समाजका अध्यक्ष र उनको जन्म स्थान संखुवासभा भएकाले दुई संस्था र दूधराम लिम्बु तेह्रथुम जिल्लाबासी र लिम्बु समुदायका भएकाले अन्य दुई संस्थाले संयुक्तरुपमा कार्यक्रम गर्न लागेका हुन् ।
सउलको सिन्छनमा काठमाण्डौ रेष्टुरेन्ट संचालन गर्दै आएका डाँगीले मंगलबार (सेप्टेम्बर २०) मा आफ्नै वासस्थानमा आत्माहत्या गरेका थिए । त्यस्तै ३ महिना अघि मात्र इपिएस मार्फत कोरियामा मजदुरी गर्न आएका लिम्बुको सेम्टेम्बर १८ तारिख सुतेकै अवस्थामा अचानक मृत्यु भएको थियो । लिम्बुको शब सोमबार नेपाल पठाइसकेको छ भने डाँगीको गत आइतबार कोरियामै अन्त्येष्टी गरिएको थियो ।
कोरियामा मजदुरी गर्न आएका मृतक लिम्बुको छोटो अवधी मै निधन भएकाले परीवारको आशालाई केही हदसम्म भएपनि राहत दिलाउन जिल्लाबासी र लिम्बु समुदायले आर्थिक सहयोग पनि संकलन गरिरहेका छन् । श्रद्धाञ्जलीसभामा कोरियामा रहेका विभिन्न पेशा र व्यवसाय गर्दै आएका सम्पूर्ण नेपालीहरुलाई आयोजकले उपस्थितीको आग्रह गरेका छन् ।
