एनआरएनए कोरियाले नेपालमा तत्काल लगानीको अवसर बारे सम्मेलन गर्ने
गैरआवासीय नेपाली संघ राष्ट्रिय समन्वय परिषद (एनआरएनए)दक्षिण कोरियाले आगामी आइतबार डिसेम्बर १३ तारिख ” नेपालमा लगानी, आत्मसम्मान ,छिटो र दीगो आमदानी ” विषयक एक दिने अनलाईन सम्मेलन आयोजना गर्ने भएका छन् ।
सम्मेलनमा प्रमुख वक्ताको रुपमा एनआरएनएका संस्थापक अध्यक्ष डा. उपेन्द्र महतो , वर्तमान अध्यक्ष कुमार पन्त , उपाध्यक्ष डा. बद्री केसी र उद्योगपति भोलेश्वर दुलाल प्रमुख वक्ताको रुपमा रहने छन् । एनआरएनए इन्भेष्टमेन्टका सिइओ अनलराज भट्टराई लगायत पर्यटनविद् विष्णुप्रसाद कँडेल र कृषिविज्ञ अरूण खनाल लगायत वक्ताहरु रहने छन् । साथै एनआरएनका युवा उद्यमीहरुसंग अन्तरकृया पनि गर्न सकिने छ ।
कोरियामा रहेका युवाहरूलाई नेपालमा विभिन्न क्षेत्रहरू कृषि, पर्यटन, हाइड्रो, रिसोर्ट आदिमा नयाँ व्यवसाय सञ्चालन गर्न र सञ्चालनमा आइरहेका व्यवसायहरूमा लगानी गराउन उत्प्रेरित गर्ने उद्देश्यले सम्मेलन आयोजना गर्न लागेको एनआरएन कोरियाका अध्यक्ष यज्ञराज सुवेदीले जानकारी गराए ।
सम्मेलनमा वर्तमान अवस्थामा नेपालको कुन कुन क्षेत्रमा कसरी तत्काल लगानी गर्न सकिने बारे पहिचान सहित जानकारी दिइने छन् । साथै लगानी बारे सरकारको वर्तमान नीति नियम र लगानीको सुरक्षीत व्यवस्था बारे स्पष्ट गराइने छ । साथै अभियानमा जोडिनु भएका युवा उधमीहरूसंग अन्तरक्रिया गर्न सकिने छ ।
कार्यक्रम कोरियन समय अनुसारदिनको साढे १ बजे र नेपालको समय अनुसार विहान १० बजेबाट अनलाईन माध्यम जुमबाट शुरुवात गरिनेछ । जुमको आइडी र पासवर्ड शनिबार बेलुका एनआरएनए कोरियाको फेसबुक पेजबाट सार्वजनिक गरिने छ ।
