पूर्वाञ्चल सरोकार समाजद्वारा “सभाहल” तथा संयुक्त कार्यालय सञ्चालन
कोरियामा रहेको सक्रिय संस्थाहरु मध्ये पूर्वाञ्चल सरोकार समाज पनि एक हो। गत अप्रील २१ तारिखदेखि यस संस्थाले आफ्नो सभाहल सञ्चालनमा ल्याएको छ। दोङ्देमून स्टेसनदेखि नजिकै रहेको यस सभाहलमा पूर्वाञ्चलमा आवद्ध रहेका १६ संस्थाहरुको कार्यालयपनि रहने अध्यक्ष गजेन्द्र सेर्माले जानकारी गराएका छन्। 
कोरियाका लागि नेपाली दुतावसका उपनियोग प्रमुख सूर्य थापाको प्रमुख आतिथ्यमा सभाहलको समुद्घाटन समारोह गरिएको थियो। उहाँले कार्यक्रमलाई सम्बोधन गर्दै पूर्वाञ्चलको यो काम निकै सह्रानिय रहेको बताएका थिए भने अन्य वक्ताहरुको जिज्ञासाको जवाफ दिएका थिए। यसका साथै दुतावासबाट आवश्यक कागजपत्र भएको अवस्थामा बिना भिसाका नेपाली नागरिकलाई राहदानी वितरण भैरहेको पनि जानकारी गराएका थिए।
यसैगरी एन आर एन अध्यक्ष वुद्धि गुरुङले कोरियामा रहेका नेपाली बालबालिकाहरुको निम्ति नेपाली विषयमा पठनपाठन गर्नको निम्ति कक्षा सञ्चालन गराउने बारे छलफल भैरहेको बताएका थिए। साथै एनसिसी अध्यक्ष हरी खनालले पूर्वाञ्चलको यो कदममा सहयोग गर्ने प्रतिवद्धता गर्दै आगामी दिनमा सहकार्य गर्दै रचनात्मक कामहरु गर्नुपर्ने धारणा व्यक्त गरेका थिए। आदिवासी जनजाति महासंघका अध्यक्ष विसन राईले कोरियामा सबै संस्था मिलेर एन आर एन अथवा एनसीसीको संयोजकत्वमा राहतकोष स्थापना गर्नुपर्ने विचार राखेका थिए।
पूर्वाञ्चलमा आवद्ध संस्थाका अध्यक्ष लगायत प्रतिनिधीले प्रतिवद्धता मन्तव्य राखेका थिए। कार्यक्रममा प्रादेशिक संस्थाका अध्यक्ष लगायत विभिन्न पेसा व्यवसायमा आवद्ध व्यक्तित्वहरुको उपस्थिती रहेको थियो। वरिष्ठ उपाध्यक्ष चित्र घलेले स्वागत मन्तव्य राखेका थिए भने महासचिव केदार निरौलाले कार्यक्रम सञ्चालन गरेका थिए।
