म्याग्देली घर निर्माणार्थ महिला पुरुष भलिबल प्रतियोगिता हुने
सोल, दक्षिण कोरियामा म्याग्देली घर निर्माणार्थ रनिङ कप २०१६ प्रतियोगिताको आयोजना गरिने भएको छ । महिला पुरुष भलिबल प्रतियोगिता म्याग्दी प्रवासी नेपाली संघ दक्षिण कोरियाले आयोजना गर्न लागेको हो । प्रतियोगिता आगामि जुलाई ३१ तारिख आइतबारको दिन गाङबुक युथ सेन्टरमा बिहान १० बजेदेखि सुरु हुने भएकोले कोरियामा रहेका विभिन्न संघ संस्थाहरुलाई खेलमा सहभागिता जनाइ सहयोग गरिदिन आयोजकले आग्रह गरेको छ ।
भलिबल प्रतियोगिताको टाइसिट दोङनेमुनस्थित नाङ लो रेष्टुरेन्टमा जुलाई १७ तारिख दिनको १२ बजे हुने भएकोले संघसंस्थाका प्रतिनिधिहरुले प्रतिनिधि पठाइदिन पनि आग्रह गरेको छ । कार्यक्रममा सफल पार्न विभिन्न संघसंस्थासहित समाजसेवी, बुद्धिजिवी, पत्रकार तथा विद्यार्थीहरुलगायत दर्शक महानुभावहरुलाई उपस्थितिको लागि अनुरोध समेत गरेको छ ।
उक्त भलिवल प्रतियोगिताका लागि टीम दर्ता शुल्क दुई लाख पचास हजार वन राखिएको छ । प्रतियोगितामा प्रथम हुने समूहलाई कप सहित १२ लाख वन, दोस्रो हुनेलाई नौ लाख वान र तेस्रो हुने दुई समूहलाई क्रमशः तीन,तीन लाख वन नगद राशि प्रदान गरिने भएको छ । त्यसैगरी महिलातर्फ प्रथम हुने समूहलाई एकलाख पचास हजार वन र दोसो समूहलाई ७५ हजार वन प्रदान गरिने भएको छ ।
प्रतियोगितासँगै सालैजो भाकाको म्याग्दीको ठेट लोक नृत्यसहित म्याग्दीकै पात्लेखेतको छिपेको रातो भालेको मासु, महभीरको घोर्ले खशीको मासु, मुदीको कोदोको तीनपाने रक्सी, म्याग्दी खोलाको असली माछाको सुकुटी सहति गुर्जाको आलुको तरकारी र सेलको स्वाद पनि चाख्न पाइने भएको छ ।
