सोनसिकलाई बार्षिक २० लाख वन सहयोग
सोल
नेपाली बिद्यार्थी समाज कोरिय (सोनसिक ) र पुसान नेशनल युनिभर्सिटी एमबिए विद्यार्थी काउन्सिलको विच पाँच बुदे एमओयुमा हस्ताक्षर भएको छ । सम्झौता अनुसार काउन्सिलले नेपाली बिद्यार्थीको हितमा कार्य गर्ने उल्लेख छ । हस्ताक्षरित एमओयु अनुसार काउन्सिलले बार्षिक २० लाख वन नेपाली बिद्यार्थी समाजलाई सहयोग उपलब्ध गराउने छ ।
सहमति पत्रमा नेपाली बिद्यार्थीहरुलाई रोजगारी दिलाउनको लागि एमबिए काउन्सिलले सहयोग गर्ने उल्लेख छ । नेपाली विद्यार्थी समाज निवर्तमान सभापति इन्दिरा तिवारी र पीएनयु युनिभर्सिटी एमबिए बिद्यार्थी काउन्सिलका सभापति जंग जिन युनले सहमति पत्रमा हस्ताक्षर गरेका छन । सहमति पत्रमा सोनसिक र पीएनयु युनिभर्सिटी एमबिए बिद्यार्थी काउन्सिलले एक अर्काका शैक्षिक कार्यक्रमलाई सहयोग पुर्याउने उल्लेख गरिएको छ । त्यस्तै नेपाली बिद्यार्थी समाजलाई कोरियाली समाजमा परिचित गराउन काउन्सिलले महत्वपूर्ण भूमिका निर्वाह गर्ने पनि सम्झौताको अर्को बुदामा समाबेश गरिएको छ ।
अध्ययन सकेर स्वेदश फर्केका बिद्यार्थीहरुलाई सोनसिकको माध्यमबाट पीएनयु युनिभर्सिटी एमबिए बिद्यार्थी काउन्सिलले समन्वय गरि राख्ने पनि सहमति भएको छ । सोल स्थित नेपाली दुतावासका कार्यवाहक राजदुत किरण शाक्यको उपस्थितिमा एमओयुमा हस्ताक्षर गरिएको थियो । कार्यक्रममा बोल्दै कार्यबाहक राजदुत किरण शाक्यले सोनसिकका शैक्षिक तथा सिर्जनात्मक कार्यको प्रशंशा गरे । सोनसिकको निवर्तमान सभापति इन्दिरा तिवारीले आफ्नो एक बर्षे कार्यकालमा एमओयु हस्ताक्षरलाई उल्लेखनीय कार्यभएको भन्दै सन्तुष्टि व्यक्त गरिन ।
पीएनयु युनिभर्सिटी एमबिए बिद्यार्थी काउन्सिलका सभापति जंग जिन युनले नेपाली बिद्यार्थी समाजसंगको सहकार्य निरन्तर हुने बताए । स्वदेशी र बिदेशी गरि करिब पाँच हजार बिद्यार्थीले पुसान नेशनल युनिभर्सिटीमा अध्ययन गरिरहेका छन । पुसान नेशनल युनिभर्सिटीको रात्री कक्षामा एमबिए अध्ययनरत कोरियन ठुला ब्यापारी र उद्योगीहरुले पीएनयु युनिभर्सिटी एमबिए बिद्यार्थी काउन्सिल गठन गरेका हुन् ।
