दक्षिण कोरियामा रहेका नेपालीको छुसक कस्तो हुँदैछ?
दक्षिण कोरिया
बिदा भन्ने बितिक्कै दिमागमा आउछ आराम र मनोरञ्जन । तर कसरी ? तरिका आफ्नो आफ्नो हुने गर्छ । विशेष चाडको समयमा हुने बिदाले ल्याउने खुशी दुईचार शब्दमा ब्याख्या हुदैन ।
दक्षिण कोरिया, ब्यस्त जिन्दगीमा फुर्सत नै कहाँ हुन्छ र ? दैनिक काम १२ घन्टा देखि १६ घन्टा सम्म चल्छ । बाँकी समयमा सुत्ने आराम गर्ने । साप्ताहिक विदा कहिले हुन्छ कहिले हुदैन । तर विशेष चाडका रुपमा रहेको छुसकको समयमा भने प्राय सबै तिर विदा छ । अर्थात आराम र मनोरञ्जन गर्ने समय ।
नेपालबाट विभिन्न उदेश्यले दक्षिण कोरियामा आएर बस्ने नेपालीहरु धेरै छन् । कोही अध्ययन गर्न आएका छन् । कोही व्यापार व्यवसाय गर्न । धेरै नेपाली भने काम गर्न दक्षिण कोरियामा छन् ।
छुसकको समयका लागि बजारमा सेल अफर प्रशस्तै छन् । जता गयो त्यतै भारी मात्रामा मुल्यमा छुट छ । कोरियामा रहेका नेपालीहरुका लागि विभिन्न खालका लाइभ कन्सर्ट, डान्स पार्टी जस्ता मनोरंजनात्मक कार्यक्रम पनि छन् । कोरियनहरुले छुसक मनाइरहदा कोरियामा विभिन्न क्षेत्रमा आवद्ध नेपालीले छुसक कसरी मनाउछन् त ?
भगवती गुरुङ, खेङगीदो ख्वाङ्जु
म नेपालको दोलखाबाट दक्षिण कोरिया आएकी हुँ । कोरिया आएको पनि चार बर्ष पुग्नै लाग्यो । पहिले पहिले म कन्सर्ट हेर्थेँ । नेपाली फिल्महरु पनि हेरियो । खुब रमाइलो पनि हुने । यही मौकामा साथीहरु सबै भेटघाट हुने भएकोले पनि रमाइलो लाग्छ । यो बर्ष भने म बहिनीलाई भेट्न ससानसि जानुछ । बहिनीको कोरिया बसाई सकिन लाग्यो । कृषिमा काम गर्ने बहिनीको यस पटक छुसकमा पनि बिदा मिलेन । त्यसैले म आफै जान्छु । बहिनीसँग भेटघाट हुँदा घरका कुरा हुन्छन् । गाउँका कुरा हुन्छन् । आफै नेपाल भएको अनुभब हुन्छ । आनन्द लाग्छ ।
धनन्जय साह ः विद्यार्थी, ख्युङही विश्वविद्यालय
म झापाको गौरीगञ्जबाट पढ्नको लागि दक्षिण कोरिया आएको हुँ । अहिले म ख्युङही विश्वविद्यालयमा इकोनोमी डेभलभमेन्टमा मास्टर डिग्री गर्दैछु । म नेपालमा राष्ट्रिय योजना आयोगमा काम गर्छु ।
छुसक कोरियनहरुको महत्वपुर्ण र ठूलो चाड हो । मैले छुसक मनाउन लागेको पहिलो पटक हो । त्यसैले धेरै उत्साहित छु । लामो बिदा हुने भएकोले म कोरियाको ऐतिहाँसिक र पुरातात्विक महत्वको ठाउँहरु घुम्ने योजनामा छु । पुराना दरबार, इतिहास झल्काउने संग्रालय र केही परम्परागत गाउँहरु घुम्छु । छुसकले विदेशीहरुलाई कोरियन संस्कृति बुझ्ने मौका दिन्छ ।
प्रनाम राई ः नाजुसी, दक्षिण कोरिया ।
म पाँचथरको रबी गाउँबाट तीन बर्ष अघि कोरिया आएको हुँ । अहिले दक्षिण कोरियाको नाजुमा छु । पहिले पहिले साथीभाइ कम थिए । चिनजान थोरै थियो । अहिले साथीहरु धेरै छन् । छुसकको पहिलो दिन नाजुमा बस्ने नेपाली समूह मिलेर फुटबल खेल्दैछौ । त्यसपछि सउल जाने कार्यक्रम छ । हामी बसेकोबाट सउल टाढा छ । लामो बिदा भएको समयमा नै हो ठाउँहरु घुम्ने । म चाहि कन्काई सांगीतिक कार्यक्रममा जान्छु । बेलुकी भने किरात यायोख्यको डान्स पार्टीमा जाने । त्यसको भोली पल्ट फेरी नाजु फर्कन्छौ ।
अस्मिता मगर ः बो¥याङसी ।
पोखराबाट दुई बर्ष अघि दक्षिण कोरिया आएको हु । छुसकमा गत बर्ष पनि रमाइलो भयो । एग्रीकल्चरमा आएकोले विदा त्यति राम्रो हुँदैन । यो सालमा पनि दुई दिन जति हुन्छ बिदा । बर्ष भरिको दुःख बिर्सेर रमाइलो गर्ने हो । म बसेको ठाउँबाट सउल जान तीन घन्टा जति लाग्छ । कन्सर्ट छ नेपथ्यको । त्यही हेर्न जाने योजना छ । साथीहरुसंग भेटघाट हुन्छ । रमाइलो हुन्छ ।
प्रकाश भट्टराई ः आनसानसी ।
मेरो घर स्याङजा हो । कोरिया आएको दुई बर्ष पुग्नै लाग्योे । गएको बर्ष खासै रमाइलो भएन । कम्पनी धेरै बिजी भएर । यो बर्ष पाँच दिन नै बिदा छ । साथीभाइसँग इभरल्यान्ड घुम्न जान्छु । कोरियाकै रमाइलो ठाउँ हो भन्छन् । घुमेको छैन । साथीसंग सउल जाने कार्यक्रम छ । नेपथ्यको कन्सर्ट हेर्छु ।
खगेन्द्र खत्री ः लालीगुराँस रेष्टुरेन्ट, फारान
मेरो जन्मस्थान भोजपुर हो । नौ बर्ष अघि कोरिया आएको हुँ । अहिले फारानमा लालीगुराँस रेष्टुरेन्ट चलाएर बसेको छु । छुसकमा अरु बेला भन्दा रेष्टुरेन्ट बढि ब्यस्त हुन्छ । भेटघाट गर्ने ठाउँ जस्तो हुन्छ रेष्टुरेन्ट । टाढा टाढाबाट नेपालीहरु खानपिनका लागि आउँछन् । खुशी लाग्छ । मेरो सानो योजना छ । एग्रिकल्चरमा काम गर्ने साथीहरुको लामो छुट्टि हुदैन । त्यस्ता साथीहरुका लागि नेपालबाट आएका कलाकारलाई समय मिलाएर यतै डाकेर रमाइलो गर्ने योजना छ ।
अन्त्यमा बर्षमा एक पटक आउने छुसकको विदा सफल रहोस् । जहाँ जसरी भए पनि रमाइलो गरेर समय बिताउनुस । शुभकामना । हैप्पी छुसक ।
