सउलमा डाईङ्ग क्यान्डल
फोनिज कोरिया संवाददाता
सउल
गाउँमा तंपाईको बाल्यकाल बितेको हो भने नेपाली चलचित्र डाईङ्ग क्यान्डल अर्थात निभ्न लागेको दियोले धेरै कुराको फेरी सम्झना गराउँछ । चप्पल छिनेर बतिमा जोड्न खोज्दा हात डढेको सम्झना होस् कि एउटा सानो चकलेटलाई फुटाएर भाग लाएर खाएको होस । एउटै चुइगम धेरै दिन चपाउँदै कतै टास्दै फेरी चपाउँदै गरेको पनि सम्झना गराउँछ । आफ्नो बाल्यकालमा पुर्याउँछ । चलचित्र दिदी बनेकी सृर्जना सुब्बा र भाइ बनेका लाक्पा सिङ्गे तामाङको वरिपरि घुमेको छ । दिदीभाइको त्याग र मायाले धेरै चोटी दर्शकको मन छुन्छ ।
सौगात मल्ल, अर्पण थापा र सृजना सुब्बाको मुख्य भूमिका रहेको चलचित्र हेरुन्जेल मनमा बाल्यकाल हट्दै हट्दैन । बालकलाकार लाक्पा सिङ्गे तामाङको अभिनय बेजोड छ । रसुवाको बिकट गाउँ गत्लाङमा छायाङ्कन गरिएको चलचित्रमा तामाङ संस्कृति, पराम्परासँगै स्थानीय मानिसले भोग्नु परेको अप्ठ्यारालाई पनि देखाइएको छ । गाउँको सेरोफेरोलाई सिनेमाटोग्राफर रबिन आचार्यले आकर्षक ढंगले प्रस्तुत गरेका छन ।
दिदीभाइको कथा बोकेको यो चलचित्र नेपालीहरुको दोस्रो ठूलो चाड तिहारको अबसरमा सुकर्म समूह दक्षिण कोरियाले सउल दोङ्देमुन कुमीन् ह्वेग्वान्मा ३० अक्टोबर आइतबार बिशेष प्रर्दशनी गर्दैछ ।
