“यलम्बर साङ्गितिक सौगात भाग-१ लाई सपोर्ट नेपाल फॉउन्डेशन द. कोरियाको कार्यक्रम सफलताको शुभकामना”
फोनिज कोरिया सम्वाददाता
बुसान, कोरियाको नयाँ वर्ष तथा मुख्य ठुलो चाड सलनालको अवसर पारेर किरात राई यायोख्खा बुसानले जनवरी २७ तारिकका दिन आयोजना गर्न लागेको यलम्बर साङ्गितिक सौगात भाग-१ कार्यक्रमको लागि सपोर्ट नेपाल फॉउन्डेशन द. कोरियाले कार्यक्रम सफलताको कामना गर्दै कोरियावासी नेपालीहरुलाई कार्यक्रममा सहभागिता जनाएर सहयोग गरिदिन पनि आग्रह गरेको छ ।
‘देश विकासको मुख्य आधार शैक्षिक क्षेत्रमा सुधार’ भन्ने नाराका साथ नेपालको दुर्गम क्षेत्रका बालबालिकाको शैक्षिक क्षेत्रमा सहयोग पुर्याउने उदेश्यले सलनालको पहिलो दिन बुसानमा आयोजित साङ्गितिक कार्यक्रममा भाग लिन नेपालका ख्यातीप्राप्त कलाकारहरु राजेशपायल राई, कोमल वली, मेलिना अमात्य, कला राई, राजेशपूमा राईका साथमा हाँस्य कलाकार राजेन्द्र पोखरेल, डान्सर पृति आले र रन्जिता लिम्बू कोरिया आउने भएका छन् । स्थानीय कलाकारहरुको समेत प्रस्तुति रहने उक्त साङ्गितिक कार्यक्रम विशुद्ध मनोरञ्जन मात्र नभई सामाजिक कार्यका लागि पनि आयोजना गरिएकोले हाम्रो सहयोग नै हाम्रो मनोरञ्जनको रुपमा सम्झेर सबैले सक्दो सहभागिता जनाएर कार्यक्रमलाई सफल पारिदिन पनि सपोर्ट नेपाल फॉउन्डेशन द. कोरियाले आम कोरियाबाशी नेपालीजनहरुमा आग्रह गरेको छ ।
प्रवासमा पनि किरातीहरुको कला, संस्कृति र पहिचानलाई जिवित राख्दै सामाजिक कार्यमा सक्रिय किरात राई यायोख्खा बुसानले छोटो समयमा नै आफ्नो संस्थालाई सक्रिय रुपमा अगाडि बढाउदै आएको छ । २०१५ र १६ को माइग्रेन्ट आरिराङ फेस्टिभलमा समेत विभिन्न देशले देखाएको आफ्नो देशको प्रस्तुति भन्दा फरक शैलीको प्रस्तुती दिदै नेपाल र नेपालीलाई चिनाउन सफल यायोख्खा बुसानले सपोर्ट नेपाल फॉउन्डेशनको आयोजनामा हुने हरेक कार्यक्रममा सहकार्य र सहयोग पुर्याउदै आएको सपोर्ट नेपाल फॉउन्डेशन द. कोरियाका सचिब श्री रमेश उप्रेतीले बताऊनु भएको छ।
त्यसैगरी बुसान सेल्टरका लागि पनि महत्वपूर्ण भूमिका निभाउदै आएको संस्था यायोख्खाले यस कार्यक्रमबाट बचेको पैसाले नेपालका ग्रामिण भेगका बालबालिकाहरुको शिक्षामा सहयोग गर्ने प्रतिवद्धता जनाएकोले पनि सपोर्ट नेपाल फॉउन्डेशन द. कोरियाले कोरियामा रहेका हरेक सामाजिक संघसंस्थाले हातेमालो गर्दै यलम्बर साङगितिक सौगात कार्यक्रमलाई सफल पार्नु पर्नेमा जोड दिएको छ ।
