अमेरिकी शहरहरुमा नेपाली परेड !
अमेरिका, न्युयोर्कको म्यानहटनस्थित ब्यस्त सडकमा आगामी मे २१ तारिक नेपालको बहुसाँस्कृतिक झाँकिहरु देखिने भएको छ । न्युयोर्कस्थित लगभग चार दर्जन बिभिन्न सँघसँस्थाहरु मिलेर सँयुक्तरुपमा नेपाल डे परेडको आयोजना गरेको हालै पत्रकार सम्मेलन गरी सार्बजनिक गरे । नेपाल डे परेडका सँयोजक मंगलदास श्रेष्ठका अनुसार परेडमा न्युयोर्कका मेयर बिल द ब्लाजियोले प्रमुख अतिथिको रुपमा सम्बोधन गर्नेछन् । परेडको आयोजना गर्नको लागि नेपाली महाबाणिज्यदुताबासको विशेष सहयोग रहने समेत श्रेष्ठले बताए ।
नेपालको पहिचान झल्कने बहुसाँस्कृतिक झाँकीहरु सहित मौलिक नाचगान प्रदर्शनी गर्दै म्यानहटनको ३८ स्ट्रीट देखि २७ स्ट्रीटसम्म मेडिसन एभिन्युमा परेड हुनेछ । दिउसो १२ बजेबाट शुरु हुने परेड पाँच बजे समापान हुनेछ । परेड मार्फत नेपाललाई बिश्व सामु चिनाउँदै नेपालको पर्यटन प्रबर्धन गर्ने आयोजक पक्षको दावी छ । आयोजक कमिटीका सदस्य सँस्था आदिवासी जानजाती महासँघ, अमेरिकाका अध्यक्ष लुईसाङ वाईबाले भने, ‘गत बर्षको परेड भन्द यो बर्ष अझ बिशाल र व्यबस्थित हुनेछ”, “यसलाई निरन्तरता बनाउँने हाम्रो सँयुक्त प्रयास हो”, गत बर्षको मे २२ तारिक न्युयोर्कमा पहिलो पटक भएको नेपाल डे परेडको संयोजक सम्हालेका वाईबाले आफ्नो भनाईमा थपे ।
न्युयोर्क बाहेक अन्य राज्यमा बसोबास गर्ने नेपाली समुदायहरुले पनि नेपाल डे परेडको आयोजना गरी नेपालको पहिचान झल्काउँने बहुसाँस्कृतिक झाँकीहरुलाई सडकमा बेला बेला ल्याउँने गरेका छन् । नर्थ क्यारोलिना, टेक्सास र कोलोराडो यसमा परेका छन् । टेक्सास नेपाली समाजको आयोजनामा टेक्सासमा नेपाली मेलाको समेत भएको थियो ।
