लोट्टोमा साटिएको भाग्य
बजारमा आलिशान घर
खुशी आफन्त र परिवार
ऊ हरेक पटक बजार पुग्दा
यस्तै सपना बोकेर
लोट्टो किन्छ
पाँच पाँच हजार कोरियन वनको ।
लोट्टो पर्नलाई
छ जोडी अंक मिल्नु पर्ने हो
ऊ अनेकौ सफलताका कथा सुन्छ
करौडो वनको लोट्टो पर्यो रे
नेपालीलाई पनि पर्यो रे
उसले हरेक पटक बजार जाँदा
उस्तै कथा सुन्छ
अनि कल्पिन्छ आफैलाई परेको
मख्ख पर्दै
किन्छ नयाँ अंकको नयाँ स्लिप
नेपालमा हुँदा पैसा लुकाउने
चोर खल्तिमा जतनले पट्याएर राख्छ ।
साथीभाइलाई धाक लाउँछ
लोट्टो परे यस्ता काम गरिन्न
भोज खुवाउँदै नेपाल गइन्छ ।
अलिकति सोजु पिउँछ
अनि सधै उसलाई सेक्या (कुकुर) भन्ने साहुलाई
उल्टै ऊ सेक्या भनेर मख्ख पर्छ ।
हरेक शनिबार लोट्टोको बिजेता घोषणा हुनु अघि
उसको स्वासको दम बढ्छ
सपनाको हिसाब किताब गर्छ
आफ्नो भाग्यमा विस्वास गर्छ ।
हरेक पटक झै यस पटक पनि पर्दैन
उसलाई लोट्टो पर्दै पर्दैन
तीन अंकमा मिल्दा पाइने पाँच हजार वन पनि पर्दैन
उसको पाँच मिनेट अघिको
भाग्य, भबिष्य र सपना सबै निरर्थक लाग्छ
निरास भएर
फ्यात्त फाल्छ लोट्टोको स्लिप
धिर्काछ आफ्नै भाग्य
कतै पर तिर साहुको स्वर सुनिन्छ
खेसेक्या अदि खास्स ? (कता मर्यो कुकुर ?)
ऊ दोडिदै जान्छ बंगुरलाई दाना हाल्न ।
