कोरियामा प्रकाश र पाख्रिनको श्रद्धाञ्जली सभामा बोल्दै किरातीले भने, ‘अबको कार्यभार आर्थिक समृद्धि’
नयाँशक्तिका युवानेता तथा लेखक, साहित्यकार मिलनकान्छा किरातीले सामन्ती राज्य व्यवस्थाको अन्त्यसँगै अबको कार्यभार आर्थिक समृद्धि निर्माण गर्नु रहेको बताएका छन ।
कोरियाको राजधानी सोलस्थित एनआरएनको भवन नेपाल हाउसमा नेपाली जनप्रगतिशील मञ्चद्धारा आयोजित भर्खरै हृदयघातबाट दिवंगत नेकपा माओवादी केन्द्रका पोलिटब्युरो सदस्य प्रचण्ड पुत्र प्रकाश दाहाल र जनवादी गायक खुशीराम पाख्रिनको श्रद्धाञ्जली सभामा बोल्दै उक्त कुरा बताएका हुन ।
उनले भने, ‘हिजो सामन्ती राज्यको कालो व्यवस्थाविरुद्ध लड्दा प्रकाशले जत्तिकै सबै नेपालीले विशेषगरी युवाहरुले योगदान दिन सकेको भए अहिले खिचडी गणतन्त्र देख्नु पर्ने थिएन । सडकबाटै जनताले पियोर गणतन्त्र प्राप्त गर्न सक्ने थिए । हिजोका आन्दोलनबाट प्राप्त उपलब्धिहरु संस्थागत गर्ने आरम्भ प्रदेश र प्रतिनिधिसभाको निर्वाचनबाट भएको छ । व्यवस्था फेर्न लड्ने सहीद र योद्धाहरुको सपना पुरा गर्न अबको कार्यभार आर्थिक समृद्धि निर्माण गर्नु हो ।’
नयाँशक्ति पार्टी साँस्कृतिक विभाग केन्द्रीय सदस्य तथा अन्तराष्ट्रिय नेपाल समाज कोरियाको सल्लाहकारसमेत रहेका किरातीले अनेक कष्ट सहेर जनताको पक्षमा अहोरात्र सिर्जनामार्फत आवाज ओकल्ने साँस्कृतिक धरोहर जनवादी गायक खुशीराम पाख्रिन दुःखी, दिनहीन जनताको मनमा जीवन्त सधैँ बाँच्ने बताए । प्रकाश र पाख्रिनको दुःखद घटनाले माओवादी केनद्रलाई अपुरणीय क्षति पुगेकोप्रति दुःख व्यक्त गर्दै पार्टीपङ्ति र शोक सन्तप्त परिवारलाई धैर्यधारण गर्ने शक्ति प्राप्त हुन सकोस भन्ने कामना गरेका थिए ।
नेपाली जनप्रगतिशील मञ्च दक्षिण कोरियाका अध्यक्ष खगेन्द्र बुढाको अध्यक्षता रहेको उक्त सभामा विभिन्न राजनैतिक दल, सामाजिक सङ्घ संस्था र लब्ध, प्रतिष्ठित व्यक्तित्वहरु उपस्थित भएर प्रकाश र पाख्रिनलाई श्रद्धाञ्जली अर्पण गरेका थिए ।
