वैदेशिक रोजगारीको लागि उत्कृष्ट गन्तब्य हो कोरिया
एईडेन छन्त्याल
कोरियासम्बन्धी लेखहरुमा प्राय कोरियाको दु:ख, कष्ट र पिडाका कुराहरुलाई मात्र पोखिएको पाईन्छ । तसर्थ यस लेखमार्फत मैले कोरियाको रमाईलो पाटोहरुलाई शब्दमा उतार्ने प्रयास गरेको छु ।
वैदेशिक रोजगारीका लागि सरकारी तवरबाटै कामदार पठाउने भएपछि रोजगारीको लागि कोरिया नेपाली युवाहरुको प्रमुख आकर्षक गन्तब्य बनेको छ । इम्प्लोइमेन्ट पर्मिट सिस्टम (ईपीएस) भाषा परिक्षा पास गरेर कोरिया जानेको संख्या हालसम्म ५० हजार पुगेको छ ।
नेपालमा काम गर्ने बानी नै नपरेको हामीलाई सुरुवाती केहि दिन घरपरिवारवाट टाढा रहेर निरन्तर एकैप्रकारको काममा १२/१३ घण्टा खट्नुपर्दा यो कोरिया हो की खोरिया हो भन्ने अनुभूति मनमा जाग्नु स्वभाविक हो । कोरिया प्रवेश गर्नुपूर्व हामी कोरियामा रोजगारदातासँग निश्चित समय अवधिको लागि सम्झौता गरेर अदक्ष कामदारको रुपमा काम गर्न जाँदैछौँ भन्ने कुरा बुझ्नुपर्छ । सोहि कुरा बुझेर मेन्टल्ली एक्टिभ भएर कोरिया प्रवेश गरीयो भने सायद गाह्रो छैन कोरियामा । जहाँ गएपनि आखिर काम त गर्नैपर्छ । काम गरिएतापनि विदाको समयमा गरिने क्रियाकलापहरु पनि उत्तिकै रमाईला हुन्छन । एकदुई अपवाद कम्पनी बाहेक प्रायः सबै कम्पनीमा शनिबार र आईतबार विदा हुन्छ । साथै वार्षिक क्यालेन्डरअनुसार पाईने सम्पूर्ण सार्वजनिक विदाहरुमा विदा हुन्छ ।
कोहि–कोहि कम्पनीले काम नै लगाएपनि ओभरटाईम मै लगाउने हो । साथै वर्षमा ३ चोटी आउने लामो विदा छुसक (कोरियाको ठूलो चाड), सलनाल (दोस्रो ठूलो चाडं) र गर्मि विदाहरुमा आयोजना गरिने साँस्कृतिक कार्यक्रमहरुमा नेपाली कलाकारहरुसँग रमाउदाको मज्जा । तथा हरेक विदाको दिनहरुमा घुम्नको लागि विभिन्न पर्यटकिय ठाउँहरुमा जाँदा वा साथीभाईहरुसँग भेटेर रमाईलो गर्दाको हरेक रमाईला क्षणहरु अविश्मरणिय बनिरहेको हुन्छन् । मनग्य आम्दानी हुने भएपछि पारिवारिक आर्थीक अवस्थामा पनि सुधार हुने नै भयो साथसाथै आफैले कमाएको पैसामा घुमफिर सपिङ्ग लगाएत सम्पूर्ण खर्च गर्न पाउँदा पनि छुट्टै मज्जा मिलिरहेको हुन्छ । कोरिया यस्तो देश हो जहाँ मनोरञ्जनका लागि गरिने सम्पूर्ण क्रियाकलापहरु गर्न पाईन्छ ।
कोरियामा सामाजिक, आर्थीक तथा भौतिक सुरक्षाका अवस्थामा पनि राम्रो रहेको छ । कामदारले रोजगारदाताहरुवाट अनावश्यक कष्टहरु प्राय व्यहोर्नु पर्दैन । कतै समस्याहरु आईपरेपनि विभिन्न क्रियाशील संघसंस्थाहरु तथा नेपाली साथीभाईहरुसँग सल्लाह सुझावहरु लिन सकिन्छ । सक्नुहुनेछ । नेपाल सरकारले नै प्रक्रिया पु¥याएर पठाउने भएको हुँदा कामदारले एक रुपैयाँ पनि अतिरिक्त शुल्क खर्चिनु पर्दैन् । त्यसैले अन्य देशमा जाँदा जस्तो ठगी हुने जोखिम शून्य रहेको छ । समस्या कम र अवसर ज्यादा भएको भएर नै हो कोरिया नेपाली कामदारको रोजाईमा परेको ।
हामी नेपालीहरु नेपालमा काम गर्न आएका ईन्डियन कामदारलाई जस्तो खालको ब्यवहार गर्छौँ । त्यस्तै खालको ब्यवहार कोरियन नागरिकहरुले हामी नेपाली कामदारलाइ कोरियामा गर्दो हो भने तँपार्इृ एकचोटी कल्पना गर्नुहोस, हाम्रो मन कस्तो हुन्थ्यो होला त्यतिबेला ? तर कोरियामा मानविय संस्कार विकसित रहेको छ । यहाँ कसैलाई पनि त्यस्तो अमानविय ब्यवहारहरु गरिदैन् । नेपालमा सामान्य मजदुरी गर्नेहरुलाई जुन खालको ब्यवहार गरिन्छ त्यस्तो ब्यवहार कोरियामा गरिदैन । कोरियामा कामलाई ठूलोसानो भनिदैँन् । कोरियाले कामलाई सम्मान गर्न सिकाएको छ । कोरियाले समयको महत्त्व र खटाईको परिभाषा बुझाएको छ । त्यसैले पनि कोरिया बैदेशिक रोजगारीको लागि उत्कृष्ट गन्तब्य बन्दै गईरहेको कुरा यथार्थ हो ।
कोरियाको सोलस्थित नेपाली दूतावासमा साढे तीन बर्ष श्रम सहचारी रहेका अनिल कुमार गुरुङ्गको भनाई अनुसार पनि ‘दिईएको जिम्मेवारी पुरा गर्नेहरु कोरियाको ज्वाँई जस्तै हुन ।’
चार वर्ष दश महिना भिसामा कोरिया गएर कम्पनि परिवर्तन नगरी एउटै कम्पनीमा उत्कृष्ट काम गर्ने कामदारलाई सो कम्पनीले चाहेको खण्डमा थप त्यति नै समयको कामदार भिसा सजिलै पाउन सकिने ब्यवस्था कोरिया सरकारले गरेको छ । साथै एकपटक कोरिया गएर कम्पनी परिवर्तन गरी फर्केका कामदारहरुको हकमा अर्को पटक कोरिया जान कम्प्युटरमा आधारित परीक्षा (सिविटी) उत्र्तिण गरी कोरिया जान पाईने ब्यवस्था गरिएको छ ।
अन्तमा हामी सम्पूर्ण नेपालीहरुवीच भाईचाराको सम्बन्ध कायम गरी डिप्रेशनको शिकार हुने समस्याहरुलाई न्यूनिकरण गरौँ । र सम्पूर्ण नेपालीको कोरिया बसाई सफल र सुखद बनोस् ।
हाल दक्षिण कोरिया
