कोरियन युद्ध अन्त्य गर्न दुबै कोरिया सहमत
उत्तर र दक्षिण कोरिया सन् १९५० मा सुरू भएको दुई देशबीचको युद्ध अन्त्य गर्न सहमत भएका छन् । दुई कोरियाको सीमावर्ती गाउँमा शुक्रबार भएको उत्तर कोरियाली शासक किम जोङ उन र दक्षिण कोरियाली राष्ट्रपति मुन जे इनबीच भएको शिखर वार्तामा सन् १९५३ मा भएको युद्धविरामपछि रोकिएको युद्ध अन्त्य भएको सहमति भएको हो ।
शिखर वार्तापछि संयुक्त पत्रकार सम्मेलनमा किम र मुनले यही वर्ष युद्ध सकिएको घोषणा गरिने बताए । पत्रकार सम्मेलनमा बोल्दै दक्षिण कोरियाली राष्ट्रपति मुनले शान्तिको नयाँ युग सुरू भएको बताउँदै अब दुबै कोरिया मिलेर जाने बताए । उत्तर कोरियाली शासक किम जोङ उनले दुबै देशका नागरिक उही रगत भएका उस्तै मानिस भएको उल्लेख गर्दै मिलेर बस्नु पर्ने बताए ।
शुक्रबार बिहान सुरु भएको दुई पक्षीय सम्मेलन ऐतिहाँसिक घटना भएको जानकारहरुले बताएका छन् । दुई कोरियाको युद्ध भए पछि सबै भन्दा पहिले दक्षिण कोरिया आइपुग्ने सासक किम जोङ उन भएका छन् ।
शिखर वार्तापछि ९ बुँदे पान्मुनजेओम घोषणा जारी गरिएको छ ।
घोषणाका बुँदा यस्ता छन्
१. सन् १९५३ युद्धविरामपछि रोकिएको युद्ध यही वर्ष अन्त्यमा भएको घोषणा गर्ने ।
२.दुबै कोरियाले आणविक हतियार निशस्त्रीकरणलाई संयुक्त लक्ष्य बनाएर कोरियाली प्रायद्वीपलाई आणविक अस्त्र मुक्त पार्न सहकार्य गर्ने ।
३.यही वर्षको हिउँदमा दक्षिण कोरियाली राष्ट्रपति मुनले उत्तर कोरियाको भ्रमण गर्ने ।
४. जमिन, समुद्र र आकाशमा भइरहेका द्वेषपूर्ण कार्यहरू बन्द गर्न पनि दुई कोरिया सहमत ।
५.मे १ देखि दुबै कोरियाले सीमा क्षेत्रमा प्रचारबाजी बन्द गर्ने ।
६. उत्तर कोरियाको गाइसियोङमा संयुक्त सम्पर्क कार्यालय स्थापना गर्ने ।
७. आउने अगस्ट १५ मा दुबै कोरियाले १९५० देखि १९५३ सम्म चलेको युद्धका कारण बिछोडिएका परिवारको पुनर्मिलन आयोजना गर्ने ।
८. पूर्वी तटमा अन्तर कोरियाली रेल सञ्जाल पुन सञ्चालन गर्ने ।
९. सन् २०१८ को एसियन गेम्समा दुबै कोरिया संयुक्त रूपमा सहभागी हुने ।
