नेपालीले नै बनाए बौद्ध गुम्बा : नौ फिट अग्लो बुद्ध प्रतिमा प्रतिस्थापन
सधै बुद्ध वचन मात्रै गुञ्जने गुम्बामा नेपाली पञ्चे बाजा पनि घन्किएको छ । गुम्बा घुम्न आउने पर्यटकका लागि रमाइलो भएको छ पञ्चे बाजा र बाजाका धुन । पञ्चेबाजा टोलीको फोटो खिचेका खिचेकै छन् । केही नेपाली युवाहरु बुद्ध नेपालमै जन्मेका हुन भन्ने दसी प्रमाणका रुपमा ‘बुद्ध वाज वर्न इन नेपाल’ लेखिएको टिसर्ट लगाएर हिड्दै छन् । कोही दौरा सुरुवालमा चिटिक्क सजिएका छन् कोही आफ्नै जातिय भेषभुषामा । साना साना पगौडा शैलीका गुम्बाहरुका बीचमा स्वयम्भु कै झल्को दिने सानो गुम्बा टल्किएको छ । गुम्बा भित्र नौ फिट अग्लो भर्खरै बुद्धत्व प्राप्त गरेझै देखिने बुद्ध प्रतिमा छ । लामा गुरुहरु पुजापाठ गरेका गरेकै छन् । यी सबै दृश्य आइतबार दक्षिण कोरियाको योङगीन शहरको वाउछङ्सा गुम्बा परिसरको हो ।
नेपाली सम्पर्क समिति एनसीसी दक्षिण कोरिया र नेपाल बौद्ध परिवार दक्षिण कोरियाको प्रयास पछि नेपालबाट गत महिना कोरिया ल्याइएको थियो बुद्धको प्रतिमा । यो सबै काम गर्न झन्डै ५ करोड कोरियन वन लाग्यो । ‘यति धेरै पैसा दक्षिण कोरियामा भएका बिभिन्न संघ संस्था र ब्यक्तिगत चन्दा नै हो । यत्रो ठूलो योजना हामीले अहिले सोच्दा कसरी सम्भव भयो होला जस्तो लाग्छ ।’ बुद्ध मुर्ति प्रतिस्थापन अभियानकी संयोजक अन्जु केसीले भनिन् । कार्यक्रमको धपेडीले गले पनि उनको अनुहारमा गर्बको भाब प्रष्टै झल्कन्थ्यो । ‘यो ऐतिहासिक नै भन्नु पर्छ । अब फेरि कोरियामा यसरी कार्यक्रम गर्न धेरै समय कुर्नु पर्ला । सबै कोरियाबासी नेपालीले सहयोग गर्नु भयो । हामी आभारी छौ ।’ सहयोगी प्रति धन्यबाद भन्न छुटाइनन् ।
झन्डै नौ फिट अग्लो तामाको बुद्ध प्रतिमालाई कोरिया ल्याउन पनि अप्ठ्यारा थिए । ‘हामीले प्लेनमा एकै पटक ल्याउन नसकिने रहेछ । त्यसैले टुक्रा टुक्रा गरेर पाँच पटकमा ल्यायौ । यही जोडेर सिंगो बनाएका हौ । सम्झदा धेरै कुराको गाह्रो थियो तर अहिले यो माहौल देख्दा सबै दुःख भुलेको छु ।’ बुद्ध प्रतिमा अभियानका लोचन राईले भने ।
दक्षिण कोरियामा रहेको नेपाली राजदुताबासले पनि धेरै सहयोग गर्यो । कार्यक्रममा प्रमुख अतिथीका रुपमा रहेका दक्षिण कोरियाका लागि नेपाली राजदूत अर्जुनजङ बहादुर सिंहले बुद्धको शान्तिको सन्देशलाई आत्मसाथ गर्दै मानव धर्म गर्नुपर्ने बताए । उनले बुद्धको सन्देशलाई बिश्वभरी छरिएर नेपालीहरुलाई यसैगरी शान्ति सन्देश फैलाउन अनुरोध पनि गरे ।
राजधानी सउल देखि ४० किलोमिटर टाढा पर्ने वाउजङ्सा महायानी सम्प्रादायका बौद्ध धर्मालम्बीहरुको प्रसिद्ध गुम्बामध्येको एक हो । गुम्बामा धेरै पर्यटक पुग्ने गर्छन् ।
तस्बिरहरु: बिमल लामा
