दक्षिण कोरियामा दुई दिनमा तीन नेपालीको ज्यान गयो

दक्षिण कोरियामा दुई दिनमा तीन नेपालीको ज्यान गएको छ । आज दिउँसो औद्योगीक दुर्घटनामा परेर एक जनाले ज्यान गुमाएका छन् भने हिजो सउलको मोटेलमा सुतेकै ठाउँमा एक जनाको मृत्यु भएको छ । त्यस्तै अर्का एक जनाले भने आत्महत्या गरेको छ ।
हिजो लमजुङ दुराडाँडा सिम्ले जमुनाका होम गुरुङको मोटेलमा सुतेकै अवस्थामा ज्यान गएको थियो । आइतबार बेलुकी मोटेलमा सुतेका गुरुङ सोमबार दिउँसोसम्म पनि कोठाबाट ननिस्किए पछि होटेल साहुले नै ढोका खोलेर हेर्दा मृत्यु भएको पाएका थिए । ‘मोटेल साहुले नै प्रहरीलाई खबर गरेको रहेछ ।’ श्रमसहचारी डिल्लिराम बास्तोलाले भने । ‘हामीले अस्पतालमा आएर बुझ्यौं प्राराम्भिक रिपोर्टमा हर्ट अट्याक भएर मृत्यु देखिएको छ ।’ उनले थपे । ‘उहाँ सन् २००८मै दक्षिण कोरिया आउनु भएको रहेछ । नेपालमा उहाँको परिवारलाई खबर गरेका छौ ।’ लमजुङ परिवार दक्षिण कोरियाका बरिष्ठ उपाध्यक्ष मेघप्रसाद वाईवाले भने । ‘हामीले पनि धेरै कुरा बुझ्नै छ ।’ अहिले गुरुङको पार्थिव शरिर सउलको हस्पिटलमा राखिएको र थप कुरा बुझ्ने प्रयास भैरहेको पनि उनले बताए ।
आज बिहान आन्सानको एक कम्पनीमा कार्यरत म्याग्दीका थापा थरका नेपालीको औद्योगिक दुर्घटनामा ज्यान गएको छ । त्यस्तै वेजम्बुमा पनि नरेश राईले आफु बस्ने ठाउँबाटै हाम फालेर आत्महत्या गरेको छ । सोलुखुम्बु निवासी राई ८ वर्ष अघि कोरिया आएका थिए ।
‘घटनाको सुचना आएको छ । धेरै कुरा बुझ्न पर्ने अबस्था छ ।’ श्रमसहचारी बास्तोलाले भने । ‘बुझेर नेपाली राजदुताबासले सम्बन्धित सबै पक्षलाई खबर गर्छ ।’