तमु धीं दक्षिण कोरियाद्वारा स्योंकैं (वनभोज) आयोजना गरिदै
सउल, तमु धीं दक्षिण कोरियाले विगतमा जस्तै यो वर्ष पनि बनभोज कार्यक्रमको आयोजना गर्ने भएको छ । आगामी जून २३ तारिक शनिबार र २४ तारिक आईतबार छुङछङ नाम्दोको बोर्याङ शहरमा रहेको बोर्यङको थोङनामु रिसोर्ट लोग्ली (충남 보령시 해안로 705-44)मा उक्त बनभोज कार्यक्रमको आयोजना गर्न लागिएको हो । स्योंकैं (वनभोज) कार्यक्रममा सहभागी बनौं, अति सुन्दर रमणीय मनमोहक दृष्यहरुसँगै प्रवासी थकित मनलाई शान्त र आनन्द दिलाऔं भन्ने नारासहित हुन लागेको उक्त बनभोज कार्यक्रममा कोरियाबासी नेपालीहरुलाई जति सक्दो सहभागीता जनाउन आयोजकले आग्रह गरेको छ ।
‘प्ये म्हस्याँ छ्या म्हमु,छ्या म्हस्याँ ल्हु म्हमु,ल्हु म्हस्याँ म्हि म्हमु” अर्थात् शास्त्र हराए संस्कार हराउँछ, संस्कार हराए संस्कृति हराउँछ, संस्कृति हराए मान्छे (जाती) हराउँछ भन्ने सोचले यसै बर्ष अप्रिल २९ मा नवगठित तमु धीं दक्षिण कोरियाको थेगू शाखा समितिसँगको यो पहिलो कार्यक्रम हो । यस स्योंकैं (वनभोज) कार्यक्रममा कोरियास्थित विभिन्न भेगका तमु दाजुभाई दिदीबहिनीहरुको सहभागितालाई विशेष मध्यनजर गरि राजधानी सउल, थेगु, गजेदो, किम्हे-बुसानबाट कार्यक्रम स्थलसम्म आउन आरामदायी डिलक्स बसको व्यवस्था गरिने आयोजक तमु धींले जनाएको छ ।
कार्यक्रममा विभिन्न स्वादिष्ट नेपाली तथा कोरियन परिकारहरु, तमु कलाकारहरुको मौलिक संस्कृति झल्किने साँस्कृतिक प्रस्तुतिहरु, संस्थाका खेलाडी तथा कलाकारहरुको सम्मान, मनोरञ्जनात्मक खेलहरु, खुल्ला नृत्य तथा गायन प्रस्तुतिहरु, समुद्री तटमा रमाईलो खेलहरु लगायतका समावेश गरिएको यस स्योंकैं (वनभोज) कार्यक्रमका मुख्य आकर्षणहरु रहेका छन् ।
तमु (गुरुङ)हरुको आपसी सद्भाव र बन्धुत्वको भावनालाई अझै मझबुत र कसिलो बनाउने र यो कार्यक्रमले संस्थाको इतिहासमा नौलो आयाम थपिनेमा आयोजक विश्वस्त छ । कार्यक्रमलाई थप उत्साहजनक उपस्थितिसँगै रोचक बनाउन यो गर्मी सिजनको शुरुवातमा सामुन्द्रिक तटमा खेलाइने खेलले सहभागि सबैको मन प्रफुल्ल हुने र अन्य विविध मनोरञ्जनात्मक कार्यक्रमहरु पृथक हुनेमा आयोजकको दावी छ ।
तमु धीं दक्षिण कोरियाद्वारा आयोजित यस स्योंकैं (वनभोज) लाई सभ्य र भव्य बनाउन कोरियामा रहनुहुने सम्पूर्ण गुरुङ (तमु) दाजुभाई, दिदीबहिनीहरु, बुद्विजिवीहरु, संस्थाका अग्रज एवं शुभचिन्तक लगायत ईच्छुक सबैमा तमु धीं दक्षिण कोरियाले हार्दिक अनुरोध समेत गरेको छ ।
“बृहत स्योंकैँ (वनभोज) कार्यक्रम”
मिति : २०१८ जून २३ शनिबार र २४ आईतबार
स्थान : थोङनामु रिसोर्ट लोग्ली 충남 보령시 해안로 705-44
