फोनिज कोरिया र तामाङ पत्रकार संघ कोरियाले दियो एकदिने आधारभुत पत्रकारिता तालिम
टंकेश लिम्बू
दक्षिण कोरियामा रहेका पत्रकारिता गर्न चाहाने युवाहरुलाई लक्षित गरेर नेपाल आदिवासी जनजाति पत्रकार महासंघ ((फोनिज) कोरिया र तामाङ पत्रकार संघ दक्षिण कोरियाले आइतबार एकदिने आधारभुत समाचार लेखन तालिम गरेको छ । सउलमा भएको कार्यक्रममा चार दर्जन युवाहरुको सहभागिता रहेको थियो ।
‘समाचार लेखन तालिमले पत्रकारिता गर्न चाहने युवाहरुलाई पत्रकारिताका बारे थोरै कुरा भए पनि सिकाउँछ । यसले मेहनत गर्ने युवालाई राम्रो मौका दिए जस्तो लाग्छ ।’ फोनिज कोरियाका अध्यक्ष तथा प्रशिक्षक गोकुल थोकरले भने । ‘अहिले कोरियाको समग्र पत्रकारिताको कुरा गर्दा त्यति राम्रो छैन । यस्ता तालिमले केही हदसम्म राम्रो गर्ला कि ?’ उनले आशा ब्यक्त गरे ।
तालिममा सहभागिहरुले पत्रकारिताका सिद्धान्त बुझ्न पाउँदा आगामी दिनमा समाचार लेखनको दायरा फरक हुने बताए । नेपाल तामाङ संघ दक्षिण कोरियाका अध्यक्ष मेघप्रसाद वाईवा त्यस्तैमा एक थिए । ‘म पनि पत्रकारितामा रुचि राख्नेमा पर्छु । आजको यो तालिमले धेरै कुरा सिक्न मद्द्त गरेको छ ।’ उनले भने । अर्का सहभागी शेरशाङ्बो शेर्पालाई पनि तालिम फलदायी भएको र पत्रकारिता बारेमा थप कुरा सिकेको बताए ।
कार्यक्रममा नेपाल आदिवासी जनजाति महासंघका कार्यवाहक अध्यक्ष मल्लिका थकालीले सबै मिलेर विदेशमा भएका युवाहरुले गरेको कामले निक्कै हौसला मिलेको बताइन् । ‘यो कार्यक्रम निक्कै प्रभावकारी छ । भोलीका दिनमा पनि यस्तो कार्यक्रम गर्दा अझ राम्रो हुन्छ।’ उनले थपिन् । तालिममा नेपालमा मुलधारमा पत्रकारिता गरेकी बाला राई, सिमा लामा, रेश्मा राई र दक्षिण कोरियामा लामो समयदेखि पत्रकारिता गरि रहेका बरिष्ठ पत्रकार डम्बर सुब्बाले विभिन्न बिधामा प्रशिक्षण दिएका थिए भने तालिममा सहभागीहरुलाई प्रमाण पत्र समेत दिइएको थियो ।
