छाङवनमा सुरु हुदै आप्रवासी महोत्सव, आइतबार नेपाली परम्परागत विवाहसँगै अविनाश घिसिङको प्रस्तुति
कोरियामा रहेका आप्रवासीहरुको लागि कोरियाको सरकारी निकायद्धारा हरेक वर्ष आयोजना गरिने माइग्रेन्ट आरिराङ मल्टिकल्चरल फेस्टिभल(माम्फ)भोली शुक्रबारदेखि सुरु हुँदै छ । ख्यङसाङनाम्दो, छाङवन शहरको योङजी पार्कमा यहि अक्टोबर ५ तारिख शुक्रबारदेखी ७ तारिख आइतबारसम्म चल्ने माम्फका लागि यसपटक नेपालबाट गायक अविनाश घिसिङ कोरिया आइसकेका छन् । गायक घिसिङसँगै विभिन्न स्थानीय कलाकारहरुले नेपाली गीत गाउने भएका छन् भने महोत्सवमा नेपाली परिकार तथा विभिन्न भेषभूषा र कला संस्कृति चिनाउने सामग्रहरुको स्टल पनि राखिने भएको छ ।
आप्रवासीहरुका लागि कोरियाकै सबैभन्दा ठुलो कार्यक्रम माम्फ ख्यङनाम माइग्रेन्ट सेन्टरको सहकार्यमा हरेक वर्ष आयोजना गरिदै आएको छ । उक्त तीन दिने आप्रवासीहरुसँगै बहुसाँस्कृतिक मेलामा नेपाल, बंगलादेश, श्रीलंका, भियतनाम, चीन, कम्बोडिया, फिलिपिन, थाइल्याण्ड, इन्डोनेशिया, पाकिस्तान, उजबेकिस्तान, जापान, मंगोललगायतका विभिन्न मुलुकहरुको सहभागिता रहने छ । महोत्सव अवधिभर विभिन्न देशको कला, संस्कृति, भेषभूषासहितको पहिचान झल्कने सामग्री प्रदर्शन गरिनुकासाथै आआफनो मुलुकको खानाका स्टल राखिनुका साथै विभिन्न गीतसंगीत प्रतियोगिता तथा खेलहरु पनि प्रस्तुत गरिने छ ।
महोत्सवको अन्तिम दिन आइतबार हुने धामुन्ह्वा परेडमा यसपटक नेपालको तर्फबाट परम्परागत शैलीमा गरिने विवाह र जन्तीलाई समावेश गरिने आयोजक मध्येका एक किम्हे माइग्रेन्ट हाउसका अध्यक्ष यज्ञराज सुवेदी बताउछन् ।
नेपाल बहुजातिय, बहुभाषिक र बहुसंस्कृतिको धनी देश हो । नेपालको यिनै विविधतालाई महोत्सवमा देखाउन खोजेको बताउदै सुवेदीले भने, ‘यो पटक मिर्याङका एक नेपाली जोडीले परम्परागत शैलीमा साँच्चिकै विवाह समेत गर्ने रे । त्यसैले यो पटकको परेडमा रियल बेहुला, बेहुली र जन्ती सहित पञ्चे बाजाका साथमा परेड अझ आर्कर्षित देखिने छ ।’
दिउसो मध्यान्हमा कार्यक्रम स्थलमा विवाह गरिने र साँझ परेडमा पञ्चे बाजाका साथ जन्ती निकालिने भएकोले जतिसक्दो नेपाली पहिरनमा उपस्थिति जनाइदिन पनि कोरियामा रहेको नेपालीलाई सुवेदीले आग्रह गरेका छन् । उनका अनुसार अघिल्लो वर्ष नेवारी संस्कृतिभित्र पर्ने लाखे नाच प्रदर्शन गरिएको थियो भने किरात संस्कृतिभित्र पर्ने साकेला सिलिलगायतका विभिन्न जातजातीका कलासंस्कृतिलाई महोत्सवमा सहभागिता गराइसकिएको छ । परेडमा उत्कृष्ठ हुने मुलुकले ठुलै धनराशीको नगद पुरस्कार समेत पाउने व्यवस्था छ भने दोसो तेस्रो र सान्त्वना पुरस्कारको समेत व्यवस्था गरिएको छ।
आप्रवासीहरुसँगै बहुसाँस्कृतिक महोत्सव (माम्फ को उदघाटनदेखि समापन कार्यक्रमसम्म विभिन्न उच्च ओहदाका पदाधिकारी सहित महोत्सवमा सहभागी राष्ट्रहरुका राजदूतहरुको समेत उपस्थिति रहने छ भने यो पटकको प्रमुख अतिथिका रुपमा फिलिपिनका परराष्ट्र मन्त्रीसहितको ३० जनाको टोली सहभागी हुने आयोजकले जनाएको छ ।
सन् २००५ मा सौलको नगरपालिका र संस्कृतिमन्त्रालयको सहयोगमा सुरु गरिएको माम्फ वास्तवमा एक भाषा एक संस्कृति भएको कोरियालीहरुका लागि बुहभाषा, बहुसंस्कृति र विविधभेषभुषा रहेको विदेशीहरुको संस्कृति देखाउन तथा चिनाउनको लागि सुरु गरिएको हो । ‘प्रत्येक वर्ष २ लाख सहभागी हुने महोत्सव रमाइलोको साथमा आफ्नो संस्कृति देखाउने राम्रो अवसर पनि हो’, सुवेदी भन्छन् । उनका अनुसार अन्य मुलुक भन्दा पृथक संस्कृति, विविध भेषभूषा र विभिन्न जातजातबीको देश भनेर चिनिने नेपाल विविधतासँगै सबै मिलेर बसेका छन् भन्ने देखाउनु पाउनु गौरवको विषय हो ।
आइतबार महोत्सवमा सहभागी हुनको लागि बुसान, किम्हे, याङसान, मिर्याङलगायतका विभिन्न स्थानबाट कार्यक्रमस्थलसम्म जानको लागि बसको व्यवस्था पनि गरिएको छ ।
