कफी सेफ (बारिस्ता) सगरमाथा आरोही दाबुटी शेर्पालाई कोरियामा सम्मान गरिने
नेपालमा उत्पादित कफीलाई विश्व बजारमा प्रबर्द्धन गर्ने उद्देश्यले २०७५ बैशाख ३१ गते सगरमाथामा चढेकी पहिलो बारिस्ता (कफी सेफ) दाबुटी शेर्पालाई दक्षिण कोरियाका चारवटा संस्थाले संयुक्त रुपमा सम्मान गर्ने भएको छ । उनले सगरमाथाको शिखरमै अन्य आरोहीलाई कफी बनाएर खुवाएकी थिइन् ।
शेर्पा अहिले नेपाली कफि प्रर्वद्धन र तालिमका लागि दक्षिण कोरियामा आएकी छिन् । यही अबसर पारेर अक्टोबर १४ आइतबार आदिबासी जनजाति महासंघ कोरिया, प्रदेश ३ एकता समाज, दोलखाली समाज र वुमन फर वुमनले संयुक्त रुपमा सम्मान गर्न लागेको छ । ‘हामीले गर्न लागेको यो सम्मान उहाँले गर्नु भएको प्रयासलाई धन्यबाद भने जस्तो हो । हाम्रो कफिको बजार विश्व भरि जान सके नेपालीकै आम्दानी बढ्ने हो । हाम्रै देशमा रोजगारी बढ्ने हो ।’ नेपाल जनजाति महासंघ दक्षिण कोरियाका सचिव तथा कार्यक्रम संयोजक युगेल तेन्डुप शेर्पाले भने ।
सम्मान कार्यक्रम सउल छोंगकको दुर्गा रेस्टुरेन्टमा गर्न लागेको दोलखाली समाज दक्षिण कोरियाका अध्यक्ष सरोज केसीले जानकारी दिए । ‘दोलखाली चेलीले यति राम्रो काम गर्नु भएको रहेछ । हामी सबै मिलेर यसो सम्झेका मात्रै हो ।’ कोरियामा भएका सबै नेपालीलाई कार्यक्रममा आइदिन पनि उनले आग्रह गरे ।
दाबुटी शेर्पा दक्षिण कोरियाबाट नेपाल फर्किए पछि कफी प्रचारका लागि पर्वतारोहणका लागि निक्कै कठिन मानिने अमादब्लाम हिमाल चढ्ने योजना रहेको छ । उनी यो बर्ष सबै भन्दा पहिले सगरमाथा सफलता पर्बतारोहण गर्ने महिला पनि हुन् ।
