तामाङ संघ दक्षिण कोरियाले सुरु गर्यो तामाङ धिम
नेपाल तामाङ संघ दक्षिण कोरियाले तामाङ धिम (घर) औपचारिक रुपमा आइतबार देखि सुरु गरेको छ । दक्षिण कोरियामा रहेका नेपालीहरुका लागि संचालन भएको धिम सउलको दोङदेमुन छ ।
‘यो झन्डै सेल्टर जस्तै हो । तर यसमा तामाङ कला संस्कृतिलाई झल्काउले प्रयास हुनेछ ।’ संघको अध्यक्ष मेघप्रसाद वाईवाले भने । ‘कम्पनी एवं अन्य क्षेत्रमा काम गरि बिचैमा काम छोडेर बसेका नेपालीहरु पुनः काम खोज्नलाई बस्नको लागि खाेलिएकाे हाे । हामी सबै दक्षिण कोरियामा रहेका नेपालीलाई धिममा बस्न आउन आग्रह गर्छौ । यो धिमको लोकेसन पनि सजिलो ठाउँमा छ । ‘ उनले थपे । धिममा पुरुष र महिलाको लागि छुट्टाछुट्टै कोठा छ ।
सउल गुम्बाका लामा प्रमुख कुन्साङ दोर्जे लामा र नार्गजुन गुम्बाका लामा प्रमुख उर्गेन लामाले बौद्ध पराम्परा अनुसार पुजा गरेर धिमको विधिवत उद्घाटन गरेका थिए । कार्यक्रममा बोल्दै नेपाल आदिबासी जनजाति महासंघ दक्षिण कोरियाका कार्यवाहक अध्यक्ष मल्लिका थकालीले धिम संचालन गरेर तामाङ संघले राम्रो काम गरेको बताइन् । ‘धिम सुरु भएको छ । निरन्तरताको लागि चुनौतीहरु छन । आँटेर काम गरे पछि पक्का पनि सफलता पाउन सकिन्छ ।’ उनले भनिन् ।
उदघाटन कार्यक्रममा नेपाल आदिवासी जनजाती महासंघ कोरिया शाखाका निवर्तमान अध्यक्ष चित्रबहादुर मोक्तान, एनआरएन एसिया प्यासिफिक महिला संयोजक जुनु गुरुङ, तामाङ पत्रकार संघ कोरियाको अध्यक्ष सिमा लामा, तामाङ संघको सल्लाहकार आङ दावा तामाङ, उइनासिंह वाइबा, एजिन लामा, वुमन फर वुमनका अध्यक्ष मदमा श्रेष्ठ, ३ नम्बर प्रदेश एकता समाजका अध्यक्ष किशोर ब्लोनलगायतको उपस्थिति थियो।
