तामाङ समुदायको ‘ह्याङला रिमठिम’ वनभोज जुलाईको २७ र २८ मा हुने
दक्षिण कोरियामा गर्मीको मौसम आइसक्यो । तँपाई यो गर्मीमा के के गर्ने सोचमा हुनुहुन्छ ? समुन्द्र जाने, चिसो पानीमा पौडिने र साथीभाइ भेट्दै रमाइलो गर्ने । यी सबै काम एकै ठाउँमा पनि हुनसक्छ किनभने नेपाल तामाङ संघ दक्षिण कोरिया र तामाङ समाज ख्यङसाङनाम्दोले जुलाईको २७ र २८ मा ह्याङ्ला रिमठिम बृहत वनभोज कार्यक्रमको आयोजना गर्दैछ ।
दक्षिण कोरियाको रमाइलो ठाउँ छुङनाम खुमसान गुन छुवु म्यान सङदान (충남 금산군 추부면 성당)को सथेसान ड्रिम रिसोर्टमा वनभोज कार्यक्रम हुँदैछ । ‘हामीले आयोजना गर्न लागेको यो ठाउँ एकदमै चर्चित कोरियन रिसोर्ट हो । जहाँ हामी तामाङ लगायत दक्षिण कोरियामा रहेका गैर तामाङ साथीभाइलाई रमाइलो गर्नका लागि उचित ठाउँ हुन सक्छ ।’ तामाङ संघका महासचिव गाेकुल थाेकरले भने । ‘सो रिसोर्टमा वाटर पार्क पनि रहेकाले वनभोजमा सहभागी साथीभाइले पौडी खेल्दै रमाइलो गर्न सक्नेछन् । त्यसैले यो पटकको गर्मीमा हामीसँग रमाइलो गर्न अनुरोध गर्दछाै ।’ उनले थपे ।
वनभोजमा कार्यक्रममा तामाङ समुदायको पराम्परागत खाना र सांस्कृतिक प्रदर्शनी हुने तामाङ समाज ख्यङसाङनाम्दोका कार्यवाहक अध्यक्ष सुजित घिसिङ बताए । ‘हामी तामाङहरु सांस्कृतिक रुपमा पनि धनी छौ । विदेशमा पनि गाउँ घरको याद आउने खालको प्रस्तुतिहरु हुनेछन् । हामी रमाइलो गर्दै दाजुभाइ भेटौ । गर्मीलाई कटाउने एउटा मौका हुनेछ, यो वनभोज ।’ उनले भने ।
रिसोर्टमा ७ सय मानिसहरु पौडी खेल्ने वाटर पार्क रहेको छ । धेरै मानिसहरु एकै पटक BBQ गर्ने सक्ने व्यवस्था रहेको छ ।
नजिकै पदयात्राका लागि पहाडहरु पनि रहेका छन् । वनभोजमा सहभागी हुनको लागि महिलालाई ७० हजार वन र पुरुषलाई ८० हजार वन शुल्क लाग्ने आयोजकले बताएका छन् ।
