नेपाल नेदरल्यान्ड्ससँग पराजित
फोनिज कोरिया संवाददाता
सोल – नेदरल्याण्ड्स भ्रमणमा रहेको नेपाली क्रिकेट टोली नेदरल्यान्ड्ससँगको पहिलो ट्वान्टी–२० अन्तर्राष्ट्रिय खेलमा नेपाल मंगलबार १८ रनले पराजित भएको छ | टस जितेर पहिला ब्याटिङ गर्न आएको नेदरल्यान्ड्सले एमस्टेलभिनस्थित भिआरए मैदानमा ५ विकेट गुमाई १ सय ३४ रन बनायो ।
लक्ष्य पछ्याउने क्रममा नेपाली कप्तान पारस खड्काले नटआउट रहँदै ४५ रनको योगदान दिएपनि अन्य नेपाली ब्याट्म्यान जम्न नसक्दा नेपाल पराजित भयो । ओपनरका रुपमा ल्याइएका उपकप्तान ज्ञानेन्द्र मल्लले २४ रन बनाए । ज्ञानेन्द्र र पारस ट्वान्टी–२० अन्तर्राष्ट्रियमा १ सय रन बनाउने नेपालको पहिलो खेलाडी बने ।
राजेश पुलामी १३ र शरद १० रनमा आउट भए । ओपनर सुवास खकुरेल २ र तेस्रो नम्बरमा पठाइएका विनोद भण्डारी ५ रनमा आउट भएका थिए । इनिङ्सको अन्ततिर प्रदीप ऐरी ६ र करण केसी २ रनमा आउट भए । वसन्त रेग्मी १ रनमा नटआउट रहे । सुवास र विनोदलाई आउट गरेका डच बलर एहसान मलिकले ४ ओभरमा २३ रन खर्चेर ३ विकेट लिए ।
यसअघि नेदरल्यान्ड्सबाट ओपनर स्टेफन मिबर्गले नटआउट ६७ रन बनाएका थिए । नेपाली बलरका अगाडि खुलेर खेल्न नसकेका उनले ६० बल खेली ६ चौका र १ छक्का प्रहार गरे । मिचेल रिप्पोन २५ बलमा २५ रन बनाई नटआउट रहे । वसन्त रेग्मीले ४ ओभरमा ३४ रन दिएर २ विकेट लिदैं नेपालबाट उत्कृष्ट बलिङ गरे ।
ट्वान्टी–२० अन्तर्राष्ट्रियमा ‘डेब्यु’ गरिरहेका करण केसीले १ विकेट लिए । २ खेलाडी रन आउट भए । करणसँगैं पहिलो आधिकारिक खेल खेलिरहेका अविनाश कर्णले ४ ओभरमा ८ रनमात्र खर्चे ।
पाँचौं ट्वान्टी–२० अन्तराष्ट्रिय खेल खेलिरहेको नेपालको यो तेस्रो हार हो । नेपालले बुधबार नेदरल्यान्ड्ससँगको शृंखलाको दोस्रो खेल खेल्ने छ ।
