यादन सेर्मा र डिल्ली फोम्बोको साथमा चुम्लुङ कोरियाले चासोक तङ्नाम मनायो।
किरात याक्थुङ चुम्लुङ दक्षिण कोरियाले आज सौल सङ्बोक खुछङको हलमा चासोक तङनाम भब्यताका साथ मनाएको छ। तङनाम बिशेष कार्यक्रममा नेपालबाट आएका कलाकारद्वय यादन सेर्मा र डिल्ली फोम्बोको साँस्कृतिक एवम सांगीतिक प्रस्तुतिमा दर्शकहरुले आनन्दले झुमेका थिए। गायक द्वयले आफ्ना आधा दर्जन बढी लिम्बू तथा नेपाली गीतहरुमा दर्शकहरुलाई मनोरञ्जन दिलाएका थिए। गीत संगीतका साथमा लिम्बू मौलिक परिकारहरु समेत ग्रहण गर्दै दर्शकहरु नाच्नमा ब्यस्त देखिन्थे।
सेवा साबा प्रवेश फियाकले चासोक/न्वागी पूजा गरेपछी सुरु भएको कार्यक्रममा ताप्लेजुङ र पाँचथरे टोलिको केलाङ प्रस्तुत भएको थियो। यसैगरी बुसान शाखाले पनि आकर्षक केलाङ पस्केका थिए। कोरियामै रहेका कलाकारहरु संगम सेर्मा, जोन तुम्बापो, अप्सन लिम्बू, ध्रुव चेम्जोङ र युगल किशोर सेर्माले पनि आ आफ्नो गायन प्रस्तुति राखेका थिए भने चुम्लुङ बुसानको तर्फबाट बल्ल भेट भो आदाङ्बेमा विवेक निङ्लेखु,दिवा लिम्बू,संजोक कन्दङ्वा, सारा श्रेष्ठ , सुक्रराज कन्दङ्वा, नोरा पोमू, मेन्सन लिम्बू र नानू योङ्हाङले नृत्य प्रस्तुत गरेका थिए। त्यसपछि चासोक तङनाम बोलको गीतमा विवेक निङ्लेखु र नाफिसा लावतीको आकर्षक नृत्यपनि रहेको थियो।
चुम्लुङ कोरियाका निवर्तमान अध्यक्ष एवम् विशेष सल्लाहकार शुन्दरदिप आङ्देम्बेले चासोक तङनामको परिचय साथै महत्त्वपनि बुझाएका थिए भने वरिष्ठ उपाध्यक्ष प्रवेश फियाकले शुभकामना मन्तव्य राखेका थिए। चुम्लुङ कोरियाका अध्यक्ष मिराक लिम्बू “अग्नि” को सभापतित्व र नेपाली राजदुतावासका कार्यबाहक राजदुत रामसिंह थापाको प्रमुख आतिथ्यमा सम्पन्न तङनाम विशेष कार्यक्रममा विशेष अतिथिहरु गैर आवासिय नेपाली संघका उपाध्यक्ष यदु लामिछाने, नेपाली सम्पर्क समितिका अध्यक्ष अञ्जु केसि, पूर्वाञ्चल सरोकार समाजका अध्यक्ष अमृत राईले शुभकामना मन्तव्य राखेका थिए भने कोरियामा रहेका विभिन्न संघ संस्थाका प्रतिनिधिहरु एवम नेपालीहरुको व्यापक उपस्थिति रहेको थियो।
