दक्षिण कोरियामा ‘तामाङ कलाकार संघ’ गठन, अध्यक्षमा युनिक दोङ
सउल । दक्षिण कोरियामा रहेर गीत संगीतको क्षेत्रमा सक्रिय रहेका तामाङ कलाकारहरुले ‘तामाङ कलाकार संघ दक्षिण कोरिया’को गठन गरेको छ । यही जनवरी २४ तारीख शुक्रबारका दिन सउलको दोङदेमुन स्थित तामाङ दिममा भएको कलाकारहरुको एक भेलाले उक्त संघको गठन गरिएको हो ।
तामाङ संघ दक्षिण कोरियाको वरिष्ठ उपाध्यक्ष रबि लामाको प्रमुख अतिथिमा भएको उक्त भेलाले युनिक दोङको अध्यक्षतामा नौ सदस्यीय कार्यसमितिको गठन गरेको छ । उपाध्यक्षमा सुर्य रुम्बा, सचिबमा मिलन दोङ, सह सचिबमा छेडुप लामा, कोषाध्यक्षमा ज्ञान लामा, सदस्यहरुमा राज ब्लोन, मनिराज लामा, अन्जय लामा र प्रयास लामा रहेका छन् ।
दक्षिण कोरियामा रहेका तामाङ कलाकारहरु सबै एकताबद्ध भएर एक अर्कोमा सहयोग गर्दै आफ्नो पेशागत हकहितको लागी उपलब्धि मुलक कार्यहरू गर्ने उदेश्यले यस संघको गठन गरेको जानकारी नव निर्वाचित अध्यक्ष युनिक दोङले दिएका छन् । परदेशमा रहेर पनि आफ्नो कला मार्फत तामाङ समाजलाई केहि गर्न सकिन्छ कि भन्ने मुख्य उदेश्यले एकजुट भएका जानकारी दिदै दोङ्ले भने ‘यसमा मलाई विश्वास गरेर अध्यक्षमा निर्विरोध चयन गर्नु भएकोमा सम्पुर्ण कलाकार साथीहरूलाई धन्यवाद । यहाँ रहेका कलाकार साथीहरूको र सिङ्गो तामाङ समुदायको उन्नति र प्रगतिको लागि राम्रो काम गर्ने मैले सक्दो कोशिस गर्नेछु ।’
साथै नेपाल तामाङ कलाकार संघ केन्द्रसँग समन्वयन गरेर थप के कस्तो कार्यहरू गर्ने सकिन्छ त्यसको लागी आवस्यक पहल गरेर अगाडि बढ्ने जानकारी दोङले दिएका छन् ।
