शुभकामना !

यो संसारको सबैभन्दा सुन्दर मान्छेहरु
यो संसारको सबैभन्दा असल मान्छेहरु
यो संसारको सबैभन्दा इमान्दार मान्छेहरु
यो संसारको सबैभन्दा कर्मशिल मान्छेहरु
यो संसारका सर्वहाराहरु
श्रमिकहरु
मजदुरहरु
आजको दिन
तिमिलाइ शुभकामना

अर्थात,
मजदुर दिवशको शुभकामना ।
इतिहासको अनेकौं कालखण्डदेखी
यो शताब्दिको उत्तरार्धसम्म आइपुग्दाको समय
जन्मिएको क्षणदेखी मृत्युअघिको पल सम्मको समय
त्यि अथाह समयहरु कहिल्यै आफ्नो हुन पाएन
कहिल्यै आफ्नो हुन दिइएन
त्यि बेहिसाब अन्तरद्वन्द्वको गर्भबाट जन्मिएको
संघर्षको अनगिन्ती भट्टिहरुमा खारिदै खारिदै
आजको सिङ्गो एक दिन
तिम्रो आफ्नो भएको हो
यो संसारका सर्वहाराहरु
श्रमिकहरु
मजदुरहरु
तिमिलाइ शुभकामना ।

यो संसारको लाखौ दुरदराजको बस्तिभित्र
आफ्नो लालाबालाहरुलाइ
झुप्रोबाट छर्लङ्ग देखिने
ताराहरुसंग टोलाउन लगाएर
बुर्ज खालिफा देखि लोट्टे हुँदै
र्‍याफल सिटि बनाउन
पंक्तिबद्ध उभिन पुगेका
त्यि महान बुवाहरु,
छोराको फुटबल खेल्ने रहरलाइ
पुरा गर्ने सामर्थ्य नपुगेपछि
निरीहबोधको अनुहार बोकेर
सन्तानको माग सम्बोधनको सुचिमा राख्दै
विशाल रंगशाला निर्माणमा पुगेर
आफैलाइ भोग चढाएका
रुपचन्द्र रुम्बा र उनका हजारौ सहकर्मिहरु,

यतिबेला –
म किङ्कर्तब्यबिमुढ छु,
आफैसंग नाजवाफ छु
यी ठेलिका ठेली इतिहसको पानाहरुमा
किन अटाइएनन तिम्रो नाम?
किन कोहि गाउन चाहदैनन तिम्रो जीवनको गीत?
किन कसैले लेख्न चाहेनन
आफ्नो उपन्यासको विम्बमा
तिम्रो संघर्षको कथा?
किन कुनै पत्रीकाले छाप्न मानेन?
किन कुनै रेडियोले पुर्‍याउन आनाकानी गर्‍यो
दुरदराजको बस्तिभित्रको झुप्रोसम्म?
तिम्रो मृत्युको खबर?

हजारौ बर्षदेखी
गिजाको चिहानमाथी निष्फिक्री उभिरहेको
पिरामिडको पिरा बनिरहेको दासहरुको खप्परमा,
इसाको कयौं सताब्दी अघिदेखी
नागबेली हुँदै पुर्ब पश्चिम दौडिरहेको
ग्रेटवालको प्रत्येक सिंढिहरुमा आफैलाइ बिछ्याएर
लाखौं खुट्टाहरुको बोझ बोकिरहेका
मजदुरको करङको हड्डिहरुमा,
बुर्ज खालिफा,आइफिल र
लोट्टे टावरहरुलाइ बोकेर उभिइरहेको
आधुनिक दासको नलिहाडहरुमा
किन जाग्दैनन तिनको प्रेत देह ?
किन प्रकट गराउदैन आफ्नो अदृष्य स्वरुप र
भत्काउदैनन आफैमाथी गरेको
शोषणको चक्रहरुलाइ,
किन चर्काउदैनन पुंजिबादी आडम्बरको
घिनलाग्दो अनुहार?
यो संसारका सर्वहाराहरु
श्रमिकहरु
मजदुरहरु
यी अनुत्तरित प्रश्नहरुको घेराबन्दिबाट नै सहि
तिमिलाइ शुभकामना ।

तर
याद रहोस,
यो समय तिमी निश्चिन्त बस्ने समय होइन
तिम्रो स्वतन्त्रताको यो एक दिन
तिमी बांचेको समयभित्रको
तिम्रो आफ्नो यो आजको दिन
तिम्रो भएकोमा रिस उठेको छ उनिहरुलाइ
तिमिबाट खोस्नको लागि भयानक षड्यन्त्र हुदैछ
संसारभरिबाट एक ठाउमा भेला भएका छन
तिम्रो दुस्मनहरु
र निर्माण गर्दैछन अत्याधुनिक अस्त्र
जो तिमि बिरुद्धको युद्धमा प्रयोग गरिनेछ
जसरी गरिएको थियो
शिकागोमा वारपारको युद्ध लडिरहेको
तिम्रो पुर्खाहरुमाथि
यो संसारका सर्वहाराहरु,
श्रमिकहरु
मजदुरहरु
तिमी प्रतिरक्षाको निम्ति तयार रहनु
तिमिलाइ शुभकामना ।