तमू धीं दक्षिण कोरियाको नवौं केन्द्रीय अधिवेशन आउँदो एप्रिल ११ मा हुने
बोम्जन गुरुङ, सउल कोरिया
२९ मार्च २०२१
दक्षिण कोरिया स्थित गुरुङ (तमू) हरुको गौरवमय जातीय संस्था तमू धीं दक्षिण कोरियाको ऐतिहासिक नवौं केन्द्रीय अधिवेशन हुने भएको छ । वर्तमान कोरोना कोभिड-१९ को महामारी र जोखिमलाई मध्यनजर गर्दै आउँदो ११ एप्रिल २०२१ को दिनलाई मिति तय गर्दै भर्चुअल जूम मार्फत उक्त अधिवेशन हुने भएको हो ।
संस्थाको विधानत: केही समय अगाडी नै अधिवेशन सम्पन्न गर्नुपर्ने भएपनि कोरोनाको कारण भर्चुअल जूम मार्फत आसन्न नवौं केन्द्रीय अधिवेशनका लागि संस्थाका संरक्षक भिम गुरुङ (पर्वत) संयोजक रहने गरि बिपिन कुमार गुरुङ, खोम प्रसाद गुरुङ, श्रीराम गुरुङ र बोम्जन गुरुङ सहित ५ सदस्यीय निर्वाचन मण्डल गठन गरिएको र अधिवेशनको सम्पूर्ण तयारी भईरहेको केन्द्रीय अध्यक्ष जीत गुरुङले जानकारी दिए ।
सन् १९९९ मा स्थापना भएको तमु धीं दक्षिण कोरियाले संस्थाले विभिन्न कालखण्डमा उदाहरणीय सामाजिक कार्यहरु सहित तमु (गुरुङ) जातिको आफ्नो मौलिक भेषभूषा, संस्कार, संस्कृति तथा परम्परा लगायतको जगेर्ना गर्ने पवित्र कार्यमा यस संस्थाले महत्वपूर्ण टेवा पुर्याईरहेको छ । कोरियामै आफ्नो दुई शाखा विस्तार र विकास गर्दै विगत लामो समयदेखि तमू धीं सेल्टर पनि संचालनमा ल्याई सेवा प्रदान गरिरहेको संस्थाको महासचिव लेसन गुरुङले स्पष्ट पारे ।
तमू धीं दक्षिण कोरियाको ऐतिहासिक आसन्न नवौं केन्द्रीय अधिवेशनलाई सभ्य र भव्य रुपमा सम्पन्न गर्न सम्पूर्ण संस्था सम्बद्ध शुभचिन्तक र कोरियावासी तमू दाजुभाई तथा दिदिबहिनीहरुलाई गरिमामय सहभागिताका लागि तमू धीं दक्षिण कोरियाले अनुरोध गर्दै हार्दिक निमन्त्रणा गरेको छ ।
