कोरियामा घरैमा बसेर कोरोना परिक्षण गर्ने टेस्ट किटको विक्रि सुरु
दक्षिण कोरियामा घरैमा बसेर कोरोना टेस्ट गर्ने किट शुक्रबार देखि बजारमा आएको छ । कोरियाली औषधी बनाउने कम्पनी हान्मीले उत्पादन गरेको किटले परिक्षण गरेको १५ मिनेट देखि ३० मिनेटमै कोरोना लागे नलागेको थाहा दिनेछ । कम्पनीले अहिले अनलाइन र स्थानीय औषधी पसलबाट परिक्षण किट किन्न सकिने जनाएको छ ।
‘यो किट निक्कै उपयोगी र विस्वासनीय भएको हामीले ठानेका छौं । अहिले बजारमा भएको कोरोना परिक्षण गर्ने तरिका निक्कै खर्चिलो र अप्ठ्यारो छ । यसको विकल्प हुन सक्छ ।’ कम्पनीले भनेको छ । एसडी वायोसेन्सर नामक औषधी वितरण गर्ने कम्पनीले बजार व्यवस्थापनको काम गरिरहेको छ ।
कोरियामा कोभिड १९ संक्रमणको चौथो लहर चलिरहेको छ । दैनिक ६ सयको हाराहारीमा नयाँ संक्रमित थपिए पनि कोरोना परिक्षणको लागि १ लाख २० हजार वन भन्दा बढि तिर्नु पर्छ । यो नयाँ परिक्षण किट १६ हजार वनमा विक्रि भैरहेको छ ।
किट मार्फत परिक्षण गर्न चाहनेले एक घन्टा अघि देखि नाक सफा गर्न नहुने हान्मीले जनाएको छ । परिक्षण गर्दा दुई वटा राता धर्का देखिएमा संक्रमित भएको र एउटा मात्रै रातो धर्का देखिएमा संक्रमण नभएको भनेर थाहा हुने पनि कम्पनीले जनाएको छ ।
कोरोना परिक्षण किटबाट आफू संक्रमित भए नभएको हेर्न सकिने भए पनि पुरै भर पर्न नसकिने कोरियाली सरुवा रोग नियन्त्रण तथा रोकथाम केन्द्र (केसीडिसी)ले जनाएको छ । शंका लागेमा किटबाट पनि परिक्षण गर्न सकिन्छ तर कही कतै कोभिड १९ बाट संक्रमितको सम्पर्कमा आए पिसिआर रिपोर्ट नै ठीक हुने तथा १८ बर्ष भन्दा कम उमेर र स्वासप्रस्वास सम्बन्धी रोग लागेकाले समेत किट प्रयोग गर्न नमिल्ने जनाएको छ ।
