तमू धीं कोरियाको पहिलो बृहत बैठक सम्पन्न ।
बोम्जन गुरुङ
३० मे २०२१, कोरिया ।
कोरियामा रहेको अति सक्रिय जातीय संस्था तमू धीं दक्षिण कोरियाको पहिलो बृहत बैठक सम्पन्न भएको छ । केन्द्रीय समितिमा रिक्त रहेको विभिन्न पदमा पदपूर्ति सहित परिचयात्मक कार्यक्रम आयोजना गरि उक्त बैठक सम्पन्न भएको हो ।
संस्थाका केन्द्रीय अध्यक्ष लेसन गुरुङको अध्यक्षता र संरक्षक भिम गुरुङ (पर्वत) को प्रमुख आतिथ्यता रहेको सो कार्यक्रमको पहिलो चरणको कार्यक्रममा संस्थाको कार्यसमितिमा आबद्ध पदाधिकारी र सदस्यहरु, संरक्षक, वरिष्ठ सल्लाहकार, सल्लाहकार, दुई शाखाका अध्यक्षहरु, विभागीय समितिमा आबद्ध व्यक्तित्वहरु विच परिचयात्मक कार्यक्रम हुनुको साथै कार्यसमितिको विभिन्न रिक्त पद अन्तर्गत केन्द्रीय उपाध्यक्ष कमला गुरुङ (लमजुङ), महासचिव सन्तोष गुरुङ (कास्की), मञ्जु गुरुङ (कास्की), होम गुरुङ (दाङ), विनोद गुरुङ (कास्की) लाई पदपूर्ति गरिएको छ ।
सोही अवसरमा केन्द्रीय उपाध्यक्ष कमला गुरुङ (लमजुङ) बाट आजीवन सदस्यता ग्रहण गर्नुका साथै कार्यसमितिमा प्रवेश गर्नुभएका सबैलाई स्वागत गरिएको छ । कार्यक्रमको दोश्रो चरणमा संस्थाको कार्ययोजना र भावी योजनाको बारेमा छलफल र अझ स्फूर्तिलो र चलायमान गराउन संस्थाले खेल्न सक्ने भूमिकाबारे सहभागीहरुले आ-आफ्नो धारणा राखेका थिए । जूम भर्चुअलमा संगठन सचिव तुरन बहादुर गुरुङको विशेष सहजीकरण सँगै पहिलो चरणमा केन्द्रीय कार्यालय सचिव सबनम गुरुङ र दोश्रो चरणमा केन्द्रीय महासचिव सन्तोष गुरुङले कार्यक्रम सञ्चालन गरेका थिए ।
