गैर आवासीय नेपाली संघ दक्षिण कोरियाको अधिवेशन सुरु : निर्वाचन जुलाई १८ हुने
गैर आवासीय नेपाली संघ, दक्षिण कोरियाको आठौं महाधिवेशन आइतबार सुरु भएको छ । राजधानी सोलमा भएको अधिवेशन दुई चरणमा हुने भएको छ ।
जुलाईको ४ मा अधिवेशन उद्घाटन र आर्थिक तथा कार्यविवरण प्रतिवेदन प्रस्तुत भएको छ । आगामी नेतृत्वको लागि जुलाई १८ आइतबार निर्वाचन हुने कार्यतालिका छ । दुई हप्ता पछि हुने निर्वाचन अनलाईन भोटिङमा आधारित हुने निर्वाचन समितिका संयोजक ज्ञानेन्द्र प्रसाद जोशीले जानकारी गराए । ‘यहाँ कोरोना महामारीका कारण धेरै मानिस एकै ठाउँमा जम्मा भएर भोट दिने अबस्था पनि छैन । अनि अहिलेको जमनामा घरैमा बसेर भोट दिदा पनि हुने भएकोले हामीले त्यसै अनुसारको अनलाइन भोटिङ गर्ने जमर्को गरेका छौं ।’ उनले भने ।
अनलाइन भोटिङ गर्ने भनिए पनि अहिलेसम्म कुनै पनि सफ्टवयर तयार भने भैसकेको छैन । ‘हामीलाई गैर आवासीय नेपाली संघ केन्द्रले एक हप्ता पछि एउटा भोटिङ एप दिने भन्ने कुरा छ । अहिले ‘डेप्लप’ भैरहेको जानकारी पाएका छौं । यदि अर्को हप्तासम्म एनआरएन कोरियाले त्यस्तो एप पाएन भने कोरियाली कम्पनीको भोटिङ एप प्रयोग गर्ने भन्ने कुरा भएको छ । यहाँको सफ्टवयर कम्पनीसँग कुरा भैसकेको छ ।’ निर्वाचन समितिका सदस्य युगेल तेन्डुप शेर्पा भने । यस अघिको निर्वाचनमा पनि कोरियाली कम्पनीको सफ्टवयर मार्फत नै मतदान गरिएको थियो ।
यस पटकको संघको सदस्यता वितरणलाई लिएर विवाद छ । गत निर्वाचनमा ३ हजार सदस्यता भएको संघमा यस पटक १ हजार ४ सय ७३ जनाले मात्रै सदस्यता पाएका छन् । धेरैलाई थाहै नदिई सदस्यता खुल्ला गरेकोले यहाँ रहेका धेरै ईच्छुक नेपालीले सदस्यता लिन नसकेको आरोप छ । त्यस्तो आरोपमा कुनै सत्यता नरहेको संघका महासचिव विमल सुबेदीको तर्क छ । ‘हामीले हाम्रो फेसबुक पेजमा राखेका थियौं । एक महिनाको समय अवधिमा जति जनाले सदस्यताको लागि आवेदन दिनु भयो त्यसैको आधारमा हामीले सदस्यता दिएका हौं । यसमा विवाद गर्नु पर्ने कारण छैन ।’ उनले भने ।
