एनआरएनए कोरियाको सचिव पदमा परी गुरुङको उम्मेदवारी ।

बोम्जन गुरुङ
२१ जुलाई २०२० कोरिया ।

गैर आवासीय नेपाली संघ राष्ट्रिय समन्वय परिषद (NRNA) दक्षिण कोरियाको आठौं महाधिवेशन (२०२१-२०२३) का लागि लागि समाजसेवी परी गुरुङ (सोल मिरा)ले सचिव पदमा आफ्नो उम्मेदवारी दर्ता गराएकी छिन् ।

उम्मेदवारी दर्ता प्रक्रिया शुरु भए लगत्तै कोषाध्यक्ष पदमा नाम दर्ता गराएको र विविध कारणवश रद्ध भएकोले पुनः सचिव पदमा उम्मेदवारी रहेको जानकारी गराउँदै नझुक्किन आम मतदाताहरुलाई आग्रह गरेकी छिन् । कोरोना जोखिमको कारण इलेक्ट्रोनिक भोटिङ सिस्टमबाट यही आउँदो जुलाई २५ तारिक उक्त महाधिवेशन हुने भएको हो ।
सन् २००९ मा कोरिया प्रवेश लगत्तै थुप्रै सामाजिक क्षेत्रमा निरन्तर आफ्नो सक्रिय उपस्थिति देखाउदै आइरहेका गुरुङ कोरिया स्थित तमु धीं ख्यङ्सनाम्दो बुसान शाखाको सल्लाहकार, आदिवासी जनजाति महासंघ बुसान शाखाका वरिष्ठ उपाध्यक्ष, किम्हे सिस्टरहुडका सल्लाहकार लगायत अन्य धेरै संस्थामा आबद्ध छिन् । स्पष्ट विचारधारा, आँटिलो स्वभाव र सहयोगी भावनाले ओतप्रोत गुरुङ कोरियाको जनसमुदायमा एक परिचित व्यक्तित्व र सफल व्यवसायी समेत हुन् ।

लामो समयदेखि कोरियामा विभिन्न संघसंस्थाहरुमा जोडिएर समाजसेवाको दायरालाई फराकिलो बनाउँदै आइरहेकी उनी गैर आवासिय नेपाली संघ, राष्ट्रिय समन्वय परिषद दक्षिण कोरियाको कार्यसमिति अन्तर्गत रहेर आफूले प्राप्त गरेको ज्ञान, अनुभवलाई आम नेपाली समुदायको हक, हित र सेवामा काम गर्ने अठोट सहित सचिव पदमा उम्मेदवारी दिएको उनले बताईन् । “समतामूलक समावेशीता रुपान्तरण सहितको पारदर्शिता” भन्ने नारालाई अघि सार्दै कोरियामा एआरएनए आम नेपालीहरुको विश्वासिलो सारथी र पूर्ण रुपमा मजदुरमैत्री हुनुपर्नेमा जोड दिईन् ।

संस्थाको नियम, मूल्य र मान्यतालाई आत्मासात गर्दै आफ्नो पदीय दायित्व र अभिभारामा कटिबद्ध रहेर स्वच्छ, निष्पक्ष र पारदर्शिता सहितको एनआरएनएको छविलाई उच्च बनाउने संकल्प र प्रतिबद्धता व्यक्त गर्दै उनी चुनावी मैदानमा उत्रिएकी हुन् । माईतिघर स्याङ्जा (हाल पोखरा) र कर्मघर बागलुङ रहेको र गुरुङकी चेली र मगरकी बुहारी रहेको सचिव पदका उम्मेदवार परी गुरुङले आफ्नो मताधिकार प्रयोग गर्दै भारी मतले विजयी गराउनुहुन कोरियामा रहनुहुने समस्त दाजुभाई, दिदीबहिनीहरु समक्ष हार्दिक अपिल गरेकी छन् ।