जापानकी राजकुमारीकाे विहे हुँदैः उनकाे राजकीय हैसियत नहुने
वर्षौंको विवादपछि जापानकी राजकुमारी माकोले आफ्ना पूर्व सहपाठी साथीसँग बिहे गर्दैछिन् । यसै महिना उनको बिहे हुनेछ र त्यसपछि आफ्नो शाही हैसियत परित्याग गर्नेछिन् । यो विवाह २६ अक्टुबर (६ कात्र्तिक) मा हुने तय भइसकेको छ । राजकुमारीसँग बिहे गर्न लागेका कुमोरो सामान्य परिवारका व्यक्ति हुन् ।
विवाहपछि माको र कुमोरो अमेरिका जाने बताइएको छ । उनीहरुको विवाहबारे अहिले जापानका स्थानीय पत्रपत्रिकाहरुमा ठूलै चर्चा भइरहेको छ । आफ्नो परिवारबारे भइरहेको टिका टिप्पणीका कारण राजकुमारी निकै विचलित बनेको इम्पेरियल हाउसहोल्ड एजेन्सीले जनाएको छ । यसअघि राजकुमारीकी ठूला–आमा अर्थात् रानी मासाकोले पनि छोरा नजन्माएको भन्दै आलोचित हुनुपरेको थियो ।
राजकुमारीका पिता फुमिहितो वर्तमान राजा नारुहितोका भाइ हुन् । सम्राट नारुहितोका छोरा छैनन् । त्यसैले, दाजुपछि फुमिहितो नै राजगद्दीका उत्तराधिकारी हुन् । माकोका भाई हिसाहितो राजगद्दीको उत्तराधिकारीको सुचीमा दोस्रो स्थानमा छन् ।
२०१२ मा पहिलो भेट
राजकुमारी माकोले सन् २०१२ मा पहिलोपटक कोमुरोलाई भेटेकी थिइन् । उनीहरु टोकियोस्थित इन्टरनेशनल क्रिष्ट्रियन विश्वविद्यालयमा सहपाठी थिए । २०१७ मा उनीहरुबीच इन्गेजमेन्ट भएको थियो । अर्काे वर्ष बिहे हुने तय थियो । तर, कोमुरोकी आमा यतिबेला आर्थिक समस्याले घेरिएकी थिइन् । यद्यपी, विवाहमा ढिलाई हुनुको कारण आर्थिक समस्या रहेको विषयलाई जापानी दरबारले स्वीकारेको छैन । यद्यपि, विवाह हुनअघि आर्थिक विषय टुंगिनु महत्वपूर्ण रहेको फुमिहितोले बताएका थिए ।
