तामाङ पत्रकार संघ दक्षिण कोरियाद्वारा नयाँ बर्षको अवसरमा सञ्चारकर्मी सम्मानित
तामाङ पत्रकार संघ दक्षिण कोरियाद्वारा सञ्चारकर्मी गोकुल दोर्जे तामाङ (थोकर), सिमा लामा र मेघप्रसाद वाईबा तामाङ नयाँ बर्षको अवसरमा शनिबार सम्मानित भएका छन् । कोरोनाका कारण भर्च्युअल माध्यमबाट नोभेम्बर १४ तारिखमा सम्पन्न दोस्रो अधिवेशनबाट निर्वाचित कार्यसमितिका पदाधिकारीलाई प्रमाणपत्र पनि प्रदान गरिएको थियो ।
सम्मानित हुनुभएका गोकुल दोर्जे तामाङ (थोकर) संघको सल्लाहकार तथा आदिवासी जनजाती पत्रकार महासंघ (फोनिज)का अध्यक्ष, सिमा लामा संघकी संस्थापक निवर्तमान अध्यक्ष र मेघप्रसाद वाईबा तामाङः संघका सल्लाहकार तथा तामाङ घेदुङ दक्षिण कोरियाका निवर्तामान अध्यक्ष हुन् ।
तामाङ समुदायको भाषा, धर्म, संस्कार र संस्कृतिलाई पत्रकारिताको क्षेत्रबाट पुर्याउनु भएको अमूल्य योगदानको उच्च कदर गर्दै सम्मान प्रदान गरिएको संघका नवनिर्वाचित अध्यक्ष अमिर योञ्जनले बताए ।
पत्रकारितामार्फत सशक्त रुपमा हाम्रो चासो र सरोकारको विषयलाई प्रस्तुत गर्ने जनशक्ति निर्माण गर्दै ठूला सञ्चारमाध्यममा लाग्न सक्नुपर्ने संघका सल्लाहकार थोकरले मन्तव्यका क्रममा बताएको छ ।
बि.सं. २०६१ सालमा स्थापना भएको तामाङ पत्रकार संघको पहिलो प्रवास शाखाको रूपमा सन् २०१८ मा तामाङ पत्रकार संघ दक्षिण कोरिया स्थापना भएको हो । संघको हाल २२ जिल्ला, २ प्रदेश, १ प्रवास र संघीय समितीहरू क्रियाशील छन् ।
