स्याङ्जा परिवार दक्षिण कोरियाको रजतोत्सव यही सेप्टेम्बर ११ मा हुने

कोरियास्थित क्षेत्रीय संस्था स्याङ्जा परिवारले आफ्नो स्थापनाको २५औं वर्ष पूरा गरेको उपलक्ष्यमा रजत जयन्ती मनाउने भएको छ । यही सेप्टेम्बर ११ मा सउलस्थित 서울시 중구 정동길 3-04518 경향신문사 12 층को हलमा कोरियन पर्व छुसकको अवसर पारेर सो जयन्ती मनाउने भएको हो ।

“कोरियामा स्याङ्जाली, रजतोत्वस यसपाली” भन्ने नारासहित मूल आयोजक, रजत जयन्ती कार्यदल र विभिन्न उपसमिति गठन गरी सम्पूर्ण तयारी सहित सो कार्यक्रम गर्ने पक्कापक्की भएको संस्थाका केन्द्रीय अध्यक्ष तथा रजत जयन्ती मूल आयोजक समिति संयोजक विजय थापाले जानकारी दिए ।

सन् १९९७ मा स्थापित वर्तमानसम्मको सम्पूर्ण संस्थागत गतिविधि, जिल्लाको संक्षिप्त परिचय, भौगोलिक अवस्थिति, धार्मिक तथा पर्यटकीय स्थलको जानकारी, प्रवासी भूमिमा रहँदाको अनुभूति/विचार, कोरियामा आर्जित ज्ञान, सीप र पूँजीको उपयोग, लगानीको अवस्था, सम्भावना र चुनौती, साहित्यिक लेख/रचना लगायतको विषय समेट्दै स्मारिका प्रकाशन गरिने रजत जयन्ती कार्यदल संयोजक कुमार थापाले बताए । कोरियास्थित विभिन्न संघसंस्था, व्यवसायीहरुसँगको सम्बन्ध र समन्वयमा थप आत्मीयता कायम राख्दै संस्थाले शुभकामना तथा विज्ञापन संकलन गर्ने काम भएको, सहयोगीहरुको नामावली स्मारिका पुस्तकमा प्रकाशन गरिने साथै सहयोगीहरुलाई सम्मान गरिने केन्द्रीय सचिव माधव अर्यालले स्पष्ट पारे ।

गौरवशाली इतिहास बोकेको स्याङ्जा परिवार दक्षिण कोरियाको रजत जयन्तीलाई सफलतापूर्वक सम्पन्न गर्न कोरियास्थित विभिन्न संघसंस्था, संस्था सम्बद्ध व्यक्तित्व, समस्त शुभचिन्तक, सम्पूर्ण नेपाली दाजुभाई तथा दिदीबहिनीहरुमा आर्थिक, नैतिक र भौतिक सहयोगको लागी संस्थाले अपिल गर्दै कार्यक्रममा उपस्थितिको लागी हार्दिक अनुरोध गरेको छ ।