वी आर ड्रिमर

शुक्रबार राति दक्षिण कोरिया राजधानी सोल तुसारोले छपक्कै छ । मौसम माइनर ८ डिग्री सेल्सियस भन्दा बढि छ । चिसो कति धेरै भने मानिसहरुले स्वास फेर्दा पनि चुरोट खाएको जस्तो बाफ निस्कन्छ । एकै छिनमा आँखी भौँमा तुसारो जम्छ । कोरियाली मौसम विभागले शनिबार विहान ४ बजे पछि हिउँ पर्ने पुर्वानुमान गरेको छ । चिसो मौसमलाई च्यालेन्ज गर्दै ख्वाङ्ह्वामुन दरबार स्क्वायर अघि फुटबल हेर्न हजारौं युवा रातो जाकेट र टाउकोमा पिलपिल रातै बल्ने बति बोकेर जम्मा छन् ।
झन्डै एक महिना अघि सोलकै ईथेवनमा हलोविन रमाइलोको लागि लाखौ मानिस जम्मा हुँदा निस्सासिएर १ सय ५८ जनाको मृत्यू भयो । अहिले एकै ठाउँमा धेरै मानिस जम्मा हुन परे कडा सुरक्षा नियम पार गर्नु पर्छ । छेउमै प्रहरी छन् । दमकल, एम्बुलेन्स छन् । दरबार स्क्वायरमा केटी टेलीकम(कोरियाको ठूलो टेलिकम मध्ये एक)ले हाई रोजुलेसनमा खेलको प्रत्यक्ष प्रशारण देखाउने व्यवस्था गरेको छ । मानिस धेरै हुने भएकोले एउटै पर्दामा हेर्दा भिड हुने भएकोले दरबार स्क्वायर तीन वटा पर्दा छन् । अघिल्लो ठूलो छ भने विचमा र पछिल्लो भागको चाहि केही साना साइजका छन् ।
कोरियाली समय अनुसार रातको ठीक १२ बजे खेल सुरु भो । खेल सुरु भएको पाँच मिनेटमा पोर्चुगलले गोल हाने पछि केही युवा निरास छन् । कोरियाली टिमका अहिलेका सबै भन्दा ठूला स्टार टोटनह्यामबाट खेल्ने सोन होङमिन नै हुन । केही समय अघि क्लबका लागि खेल्दा उनी घाइते भएका थिए । त्यसले अहिले माक्स लगाएर खेलेका छन् । उनको खुट्टामा बल पुग्दा कोरियाली समर्थक केही होला कि भनेर चिच्याउँछन् दरबार स्क्वायर नै थर्किने गरि । ‘साराङ हे यो सोन ओप्पा ।’ ( माया गर्छु । सोन दाइ ।) कोरियाली केटीले दाइलाई ‘ओप्पा’ भन्छन् । अनि मन परेकी केटी वा प्रमिकाले पनि ‘ओप्पा’ नै भन्छन् । त्यसैले कसले भनेको त्यही अनुसारको अर्थ लाग्छ । सोन कोरियाली केटीका लागि आइडिएल ‘ओप्पा’ हुन् । उनी फुटबलर मात्रै होइनन् । स्टार हुन् । कोरियाका अधिकांश ठूला ब्रान्डमा उनी ब्रान्ड एम्बास्डर छन् ।
कोरियाले भन्दा पोर्चुगलकै खेलाडीको खेल राम्रो जस्तो भए पछि केही युवा निरास हुन्छन् । भित्रै देखि स्वास तान्छन् स्स्स्स्स्स । यो स्टाईल कोरियालीले दुःख देखाउँदा गर्ने तरिका हो । फेरी युवाहरु हात हल्लाउँदै विटिएसका गीत गाउँछन् ।
संसार भरि नै चर्चित कोरियाली संगीतिक ब्यान्ड छ विटियस । त्यही ब्यान्डका गायक जन जङकुकले यही फिफा वल्डकपका लागि गीत गाएका छन् । उनले विश्वकपको उद्घाटनका बेला पनि यो गीत गाएका थिए ।
लुक हु वी आर, वी आर द ड्रिमर
वी मेक इट ह्यापन्, कज वी विलिभ ईट ।
(हेर्नुस् हामी को हौ ? हामी हौ स्वपन्द्रष्टा ।
सपनालाई हामी बिपना विनाउँछौ ।
विपनामा हामी विस्वास गर्छौ । )

खेलको २७ मिनेटमा सोल देखि ३ सय किलोमिटर दक्षिणमा पर्ने उल्सान हुन्डाई क्लवबाट खेल्ने किम योङग्वानले गोल गरे पछि एकाएक महौल तातियो । किम कोरियाकै आई लिगको खेल खेल्छन् ।
शक्तिशाली देशहरुलाई हराउँदै शुक्रबार नै छिमेकी देश जापान नक आउट चरण पुगि सकेको छ । कोरियालीहरु जापानलाई मन पराउँदैनन् । सन् १९१० देखि दोस्रो विश्व युद्धसम्म कोरियालाई उपनिवेश बनाएको रिस अहिले पनि बेला बेला देखिन्छ ।
‘ईल्बोन सेख्या दुरि । अत्तक्के उल्लाखास ?’ जापानीज छाउराहरु कसरी माथि पुगे ? कम्पनीका साहु विहान रिसाउँदैथे । पत्याउनै मुस्किल जापानले स्पेनलाई हरायो भन्दा । भयो त्यस्तै ।
‘उरी दो उल्लाखाएदे ओनुल ।’ हामी पनि माथि जान पर्छ आज । झिनो स्वरमा भनेकाथे उनले । शायद उनैलाई विस्वास थिएन होला ।
खेलको निर्धारित समय सकिएर ईन्जुरी सयममा कोरियाका उनै स्टार फुटबलर सोनले अर्का प्रिमियर लिग नै खेल्ने ह्वाङ् हि चाङ पास दिए । कोरिया दुई गोल पोर्चुगल एक । दरबार स्क्वायर थर्किने गरि खुशीयाली मनाए । चिसो मौसम फेरी तातियो । खुशीले धेरैको आँखा रसाए ।
कोरिया पोर्चुगलको खेल सकिए पनि अर्को चरण कुन टोली पुग्छ टुङ्गो लागेको थिएन । उरुग्वे र घानाको खेल सकिएकै थिएन । एक छिन समय रोकियो । दरबार स्क्वायर शान्त भो । पर्दामा कोरियाली खेलाडीले अर्को चरण पुगेको खुशीयाली मनाए । यता दरबार स्क्वायरका सबै कोरियाली चिच्याए ।
बाह्र बर्ष पछि कोरिया नकआउट चरणमा पुग्यो । यस अघि पछिल्लो पटक सन् २०१० मा समूह चरण पार गरेको थियो भने सन् ००२ मा जापानसँगै कोरियाले आयोजना गरेको फिफा वल्डकपमा सेमिफाइनल पुगेको थियो । नकआउट चरणमा ब्राजिल छ त ?
बीटिएसको गीत वी आर ड्रिमर ।