कोरियामा अवैधानिक बसोबास गर्ने विदेशीहरु माथी कडा धडपकड गर्ने
दक्षिण कोरियाको सरकारले २ महिना सम्म अबैधानिक बसोबास गरि रहेका विदेशी मजदुरहरु माथी संयुक्त रुपमा व्यापक धडपकड गर्ने योजना रहेको कोरियाली समाचारपत्रहरुले जनाएको छ ।
कोरियाको कानुन तथा न्याय मन्त्रालयले गत फेब्रुअरी २६ तारिख आगामी मार्च २ तारिख देखि अप्रिलको ३० तारिख सम्म अवैधानिक बसोबास गरि रहेको विदेशी माथि संयुक्त रुपमा धडपकड गर्ने घोषणा गरेको जनाएको छ । घोषणा पत्रमा प्रहरी, श्रम मन्त्रालय, भूमि, पूर्वाधार तथा यातायात मन्त्रालय र समुन्द्री प्रहरीको संयुक्त टोलीले कोरियामा अवैधानिक रूपमा बसोबास गर्ने विदेशीलाई धडपकड गर्ने योजना रहेको बताएको छ । कोरियन नागरिकहरुको रोजगारीलाई अतिक्रमण गर्ने विदेशी, अवैधानिक विदेशीहरुलाई रोजगारी दिने कम्पनी, गैरकानुनी रुपमा कोरिया प्रवेश गर्ने विदेशी, रोजगारीका दलालहरू माथि पनि कारबाही केन्द्रित गर्ने जनाएको छ ।
कोरिया सरकारले धडपकडको क्रममा माग गरिका डाटाहरु बिना कारण पेश गर्न अस्वीकार गरे अख्तीयारी गर्ने जनाएको छ । अनुसन्धानबाट पक्राउ परेका अवैधानिक विदेशीहरूलाई देश निकाला गरेर पुन कोरिया प्रवेशमा प्रतिबन्ध लगाइने बताएको छ । सरकारले यस धडपकडलाई शुरुवातीको रुपमा लिई आवश्यकता अनुसार संयुक्त धडपकड टोली गठन गरि “निरन्तर धडपकड प्रणाली“ सञ्चालन गर्ने निर्णय गरेको जनाएको छ । विदेशीहरू बढी बसोबास गर्ने क्षेत्रमा संयुक्त रुपमा निरीक्षण र गस्ती पनि एकै समयमा सञ्चालन गरिने पनि उल्लेख गरिएको छ ।
कानुन तथा न्याय मन्त्री हान दोङ–हुनले भन्नु भयो, “यो वर्ष अवैधानिक बसोबास गर्ने विदेशीहरु घटाउने ५ वर्षीय योजनालाई कार्यन्वयन गर्ने पहिलो वर्ष पनि भएकोले व्यापक रुपमा कडा धडपकड मार्फत बसोबासमा व्यवस्थीत नितीनियम कायम गर्न सक्दो प्रयास गर्नेछौ । “
कोरियाको कानुन मन्त्रालय अन्र्तगतको अध्यागमन कार्यलयको तथ्याङ्ग विभागका अनुसार हाल कोरियामा बसोबास गर्ने विदेशीहरुको संख्या ४ लाख १० हजार रहेको जनाएको छ ।
