विश्व जनदिवसमा ख्यङनाम प्रान्तबाट नेपाल र श्रीलंका सम्मानित

ख्यङनाम माइग्रेन्ट सेन्टरले आयोजना गरेको १६ औं विश्व जन दिवस आइतबार ख्यङनाम प्रान्तको कार्यालयको सभागृहमा सम्पन्न भएको छ । विदेशी कामदार, विद्यार्थी र बहुसाँस्कृतिक परिवारसहित एक हजार भन्दा बढी सहभागिता रहेको उक्त कार्यक्रममा लामो समयदेखि विभिन्न कार्यक्रमहरुमा सहभागिता जनाएर आफ्नो समुदायको लागि विशेष योगदान पुर्याउदै आएका नेपाल र श्रीलंकाका २ जना विदेशी कामदारहरुलाई ख्यङनाम प्रान्तबाट सम्मान तथा अवार्ड प्रदान गरिएको थियो । जस्मा नेपालको तर्फबाट छाङवनमा बसोबास गर्दै आएका केदार अधिकारीले उक्त अवार्ड पाएका थिए ।

सम्मानित भएपछि आफुमा थप जिम्मेवारी बढेको महशुस गर्दै प्रफुल्लित मुद्रामा अधिकारीले भने, “यो सम्मानले मलाई अझ सामाजिक गतिविधिमा लाग्नको लागि हौसला मिलेको छ । म आगामि दिनहरुमा पनि आफुले सक्ने सहयोग र नेपाली समुदायको लागि केही गरि राख्ने छु ।” इपिएस प्रणाली मार्फत कोरिया आएका अधिकारी हाल F2 भिषामा कार्यरत छन् ।

बहुसाँस्कृतिक बालबालिकाहरुको सामुहिक गायनबाट सुरु भएको उदघाटन कार्यक्रममा १५ मुलुकको प्रतिनिधित्व गर्दै स्टेजमा आआफ्नो मुलुकको झण्डा फहराउदै मार्चपास गरेका थिए भने मंगोल तथा अन्य मुलुकको तर्फबाट गीत तथा आकर्षक नृत्यसहितको प्रस्तुती रहेको थियो ।

कार्यक्रमको दोस्रो चरणमा ख्यङनाम प्रान्तको कार्यलयको अगाडि रहेको खुला चौरमा सहभागी विभिन्न मुलुकका विदेशीहरुबिच खेलहरुको प्रतिष्पर्धा गरिएको थियो । त्यसैगरी निशुल्क चिकित्सा सेवासहित विभिन्न परामर्शका स्टलहरुसँगै हरेक देशको खानाका स्टल, विभिन्न आकर्षक सामग्रीहरु समेत बिक्री वितरणमा राखिएको थियो ।
हरेक वर्ष मे २० मा पर्ने विश्व जनदिवस विदेशी र स्वदेशीबिचको सामाजिक वातावरण सिर्जना गर्दै कोरियन र विदेशी कला संस्कृति र परम्परालाई साझा गर्दै अगाडि बढ्ने उदेश्यले सन् २००७ बाट सुरु गरिएको हो । कोरियाका विभिन्न स्थानमा आयोजना गरिदै आएको उक्त कार्यक्रम कोभिड १९ का कारण ४ वर्ष पछि आयोजना गरिएको हो।