पहिलाे नेपाली महिला मैत्रीपूर्ण फुटबल र ह्वासाङ पुरूष फुटसल कप हुने

अमिर योन्जन ।  दक्षिण कोरियामा पहिलो पटक नेपाली महिला मैत्रीपूर्ण फुटबल प्रतियोगिता हुने भएको छ । यही जुन महिनाको ३० तारिख आइतबार यहाँ बसोबास गर्ने नेपाली खेलाडी महिलाहरूको प्रतियोगिता शुभारम्भ गर्न लागेको हो ।

नेपाल फुटबल महासङ्घ, दक्षिण कोरियाको अध्यक्ष ब्रो तमु (कृष्ण गुरुङ)ले एक सूचना जारी गर्दै महिला फुटबल खेलाडी र फुटबल प्रेमीहरूलाई उपस्थितिको लागि आव्हान गरेको छ । प्रतियोगिता कोरियाको ख्याङ्गीदो प्रान्तको ह्वासाङ सी क्षेत्रको याङ्नाममा हुने सूचनामा उल्लेख छ । महिला मैत्रीपूर्ण खेल मध्यान्ह १२ बजे विश्राम समयमा हुने उल्लेख छ ।

यता सोही स्थानमा आइतबार नै पुरुष फुटसल फुटबल पनि आयोजना रहेको छ । ह्वासाङ नेपाली फुटबल क्लबको आयोजनामा ‘पहिलो ह्वासाङ फुटसल कप–२०२४’ प्रतियोगिता हुन लागेको हो । ‘फुटबल प्रवासमा एकता, मनोरञ्जन, स्वास्थ्य जीवनको लागि आवश्यकता’ भन्ने मूल नाराका साथ आयोजना गर्दै छ ।

टाई सिट अनुसार फुटसल प्रतियोगितामा ३२ समूहले दर्ता गरेका छन् । १६/१६ टिम गरी पोल ए र पोल बी गरी खेलाइने सूचनामा उल्लेख छ । सबै खेल नक आउट प्रणालीमा खेलाइने र प्रत्येक खेलको १५/१५ मिनेटको समय तोकिएको छ । आयोजकले २३ तारिख आइतबार फारानमा टाई सिट बाँडफाँड गरेको थियो ।

पुरुष फुटसल प्रतियोगिताको विजेताले कोरियन वन तीस लाख, सिल्ड, मेडल र प्रमाणपत्र पाउने छन् । त्यस्तै उपविजेताले कोरियन वन बिस लाख, सिल्ड, मेडल र प्रमाणपत्र पाउने छन् । उत्कृष्ट खेलाडी, सर्वाधिक गोलकर्ता र उत्कृष्ट गोल रक्षकले नगद १ लाख वन सिल्ड, मेडल र प्रमाणपत्र पाउने ह्वासाङ नेपाली फुटबल क्लबको खेलाडी युवेन तुम्बापो लिम्बुले जानकारी दिए । र मैत्रीपूर्ण महिला खेलमा सहभागी खेलाडीहरूले प्रमाणपत्र पाउने छन् । प्रतियोगिता बिहान ८ बजेदेखि सुरु हुने छ ।