नेपाल एयरलाइन्स काठमाण्डौं–सौल सुचारु भए मात्र कोरिया भ्रमणको सार्थकता ठान्छु: गगन थापा
अमिर याेन्जन । नेपाली काँग्रेसका महामन्त्री एवं सांसद गगन कुमार थापाले नेपाल वायुसेवा निगमको जहाजले सौल–काठमाण्डौं, काठमाण्डौं–सौल उडान भयो भने मात्रै आफ्नो दक्षिण कोरिया भ्रमण सार्थक हुने बताएको छ ।
जुलाई २८ आइतबार सौलमा यहाँको नेपालीहरूसँग नेपाली जन सम्पर्क समितिले आयोजना गरेको अन्तरक्रिया कार्यक्रममा मन्तव्य राख्दै महामन्त्री थापाले नेपाल एयरलाइन्स काठमाण्डौं–सौल उडान, कोरियाबाट फर्केका नेपालीहरू देशमै रोजगारी गरी बस्न सक्ने वातावरण बनाउन पहल गर्ने बताएका हुन् । महामन्त्री थापाले भने, ‘नेपाल एयरलाइन्स काठमाण्डौं–सौल फ्लाइट, एजुकेसन कन्सल्टेन्सीबाट ठगेर विद्यार्थीहरू आउन बन्द र कोरियाबाट थप पर्यटकहरू नेपाल ल्याउन सक्ने वातावरण बन्न सक्यो भने मेरो कोरिया भ्रमण सार्थक भएको ठान्छु ।’ यसमा थप छलफलहरू गर्दै गरौला उनले थपे ।
त्यस्तै महामन्त्री थापाले प्रवासमा रहेको जनसम्पर्क समिति भित्र गुटबन्दी नगर्ने आग्रह गरे । उनले भने, ‘नेपालमा हामी दलहरूसँग यति धेरै झगडा गरेका छौँ । पार्टीभित्र यति धेरै गुटबन्दी गरेका छौँ । जन सम्पर्क समितिले गुटबन्दी गर्नै पर्दैन । हामीलाई हेरेर, हाम्रो नाममा नलड्नुस्, यहाँभित्र एकता गर्ने कुरा जति गर्नु हुन्छ, त्यो नै राम्रो कुरा हो ।’
त्यस्तै नेपाल कोरिया सम्बन्धको पचास बर्ष पुगेको अवसरमा यहाँ केही तयारी गरेर भव्य कार्यक्रम गर्न दुतवास तथा नेपालीहरूलाई महामन्त्री गगन थापाले अनुरोध गरेको छ । उनले भने, दुतवासले सहकार्य गर्लान्, तर यहाँ रहेको सङ्घसंस्था पनि मिलेर भव्य कार्यक्रम गर्न अनुरोध गरे । महामन्त्री थापाले भने, ‘केही चार पाँच महिनाको समय राखेर, सकिन्छ भने नेपालको पर्यटन मन्त्री नेपाल एयरलाइन्समा चढेर आउने लक्ष्य राखेर गर्नुहोला ।’
यहाँ रहेका नेपालीहरूसँग महामन्त्री एवं सांसद गगन थापा, काँग्रेसका केन्द्रीय सदस्य एवं जन सम्पर्क समिति समन्वय विभागका प्रमुख किरण शर्मा पौडेलसँग अन्तरक्रिया गर्यो । अघिल्लो दिन शनिवार बेलुका नेपाली जन सम्पर्क समितिका सदस्यहरूलाई नेताहरूले प्रशिक्षण पनि दिइएको थियो । प्रशिक्षण कार्यक्रममा केही व्यक्तिहरू पार्टी प्रवेश पनि भएका छन् । एक कार्यकर्ताका अनुसार सामाजिक संस्थाका व्यक्तिहरू पनि पार्टीमा प्रवेश भएको बताए ।
अन्तरक्रियामा बृहत् हुन सकेको छैन । कार्यक्रमको नाम अन्तरक्रिया भने पनि बृहत् रूपमा नेपाली युवाहरूसँग अन्तरक्रिया भने हुन नसकेको हो । अन्तरक्रिया भने पछि भुईँ तहसम्म प्रश्नोत्तर र संवाद हुने अपेक्षा राखेर टाढा टाढादेखि सहभागी भएको थियो । एक सहभागीले कार्यक्रमलाई कोड गर्दै भने, ‘अन्तरक्रिया नाम मात्रै रहेछ, आ-आफै भाषण मात्रै गर्यो, हामीले टाढाबाट आएर पनि भावी युवा प्रधानमन्त्री वा सभापतिलाई एउटा प्रश्न गर्न नपाएकोमा दुःख लाग्यो ।’ उनले भने, बृहत् अन्तरक्रिया भन्ने अनि केही प्रश्नोत्तर गर्न नपाउने पनि कोरियामै हुने रहेछ ।
कार्यक्रममा आयोजकले कोरियामा रहेको विभिन्न दलका सङ्गठनहरूका प्रतिनिधि, सामाजिक संस्थाका प्रतिनिधि लगायतलाई मात्रै मन्तव्य राख्न समय दिइएको थियो ।
