सउलमा द एज ब्यान्डसँग झुमे दर्शक
अमिर याेन्जन । युरोप, खाडी क्षेत्रमा साङ्गीतिक प्रस्तुतिको यात्रा सकेर दक्षिण कोरिया झरेका ‘द एज ब्यान्ड’ले राजधानी सउलको कोरिया युनिभर्सिटीका हलमा नेपाली दर्शकहरूलाई आफ्नो प्रस्तुतिले मन्त्रमुग्ध बनाएको छ ।
पप सङ्गीतमा चर्चित पुरानो ब्यान्ड लमजुङ परिवारको आयोजनामा ‘मर्स्याङ्दी साङ्गीतिक सौगात भाग–३’ मा कोरिया आइपुगेको हो । युरोपको विभिन्न देश, यता दुबईमा प्रस्तुति सकेर अन्तिम यात्रामा कोरिया आइपुगेको भोकलिस्ट जीवन गुरुङले बताए ।
कोरियन चाड छुसकको पहिलो बिदा आइतबार आयोजना भएको ब्यान्डको कार्यक्रममा दर्शकहरू लगभग ४ हजार पाँच सयको हलको सिटमा आधा भरिभराउ थिए । स्थानीय समय अनुसार दिउँसो औपचारिक कार्यक्रमपछि सुरु भएको कन्सर्ट बेलुकी ९ बजेसम्म चलेको थियो ।
बेलुकी साढे ६ बजे स्टेजमा प्रवेश गरेका एज ब्यान्डले नेपाली युवा पुस्ता मात्रै होइन कोरियन दर्शकलाई पनि झुमाएका थिए । ब्यान्डले मेरो आँसु, नचाहेको होइन, सम्झिने मुटु, थाहा छैन, तिम्रो याद, जब तिमीसँग, कसलाई, भुलाउन खोजूँ, तिम्रो जित, शान्तिलगायत दर्जनौँ गीतहरू सुनाए । भोकलिस्ट जीवन गुरुङले एउटा गीतको प्रस्तुति सकेपछि दर्शकहरूमाझ भलाकुसारी गरे । उनले दर्शकलाई भिडभाडमा महिलाहरूलाई केटाहरूले ‘ब्याड टर्च’ जानी नजानी नगर्न आग्रह गरे । शान्त र सुरक्षा भएर गीतसंगीतसँग रमाउन अनुरोध गरे ।
भोकलिस्ट जीवन गुरुङलाई गिटारमा विष्णु गुरुङ, ड्रममा गणेश राई, बेस गिटारमा अमित गुरुङ र साउन्ड इन्जिनियरमा अरुण तण्डुकारले साथ दिएको थियो ।
‘मर्स्याङ्दी साङ्गीतिक सौगात भाग–३’ कार्यक्रममा ब्यान्डको प्रस्तुति भन्दा अगाडी डान्स युनिभर्सिटी २०२३ का विजेता खुसी कार्की र स्थानीय कलाकारहरूले गायन तथा नृत्य प्रस्तुति दिएको थियो ।
