विविध कार्यक्रम सहित कोरियामा वृहत दशैँ महोत्सव सम्पन्न

कोरियाको आन्सान शहरमा वृहत दशैँ महोत्सव सम्पन्न भएको छ। अक्टोबर १३ तारिख आइतबारका दिन आन्सान स्थित 화랑 유원지 पार्कमा सम्पन्न महोत्सवमा टीका जमारा ग्रहण साथै विविध साँस्कृतिक कार्यक्रम रहेको थियो। कार्यक्रममा उपस्थितहरुले कोरियामा रहेका ८८ वर्षिय ज्येष्ठ नागरिक देउ कुमारी थापाको हातबाट टीका तथा जमरा ग्रहण गरेका थिए।

नेपालीहरुको उल्लेख्य उपस्थिती रहेको उक्त कार्यक्रममा विविध मनोरञ्जनात्मक सांगितिक एवम साँस्कृतिक झाँकिहरु प्रस्तुत गरिएको थियो। आन्सान स्थित कोरियन कलाकारको टोलीले नेपाली लोक धून ” रेशम फिरिरी…” बाद्यवादनबाट पस्केका थिए । यसैगरी कोरियन आरिराङ लगायतका धूनहरुले दर्शकलाई मोहित बनाएका थिए। आन्सानका तेक्वान्दो समूहले आफ्नो आकर्षक कलाद्वारा उपस्थितिको मन जितेका थिए। नेपाली कलाकारको टोलीबाट पञ्चेबाजा देखि विभिन्न साँस्कृतिक नृत्यहरु प्रस्तुत भएका थिए भने केहिले आफ्नो सुमधुर आवाजका माध्यमबाट गायन पस्केर दर्शकहरुलाई नचाएका थिए। यसैगरि विभिन्न स्टलहरुमा नेपाली मौलिक खानाका परिकारहरु थिए भने नेपाली तथा कोरियन परम्परागत पोषाकहरु पनि राखिएका थिए।

सोहि कार्यक्रममा नेपाल र कोरियाबीचको दौत्य सम्बन्ध ५० औँ वर्ष पूरा भएको उपलक्ष्यमा शुभकामना एवम उपहार आदानप्रदान गरिएको थियो। नेपाली राजदूतावासका कार्यबाहक राजदूत महामहिम पुष्पराज भट्टराई र आन्सान नगरका उप मेयर किम थे सुनबीच उपहार आदानप्रदान गरिएको थियो। नेपालको तर्फबाट एक थान आँखिझ्याल, एक थान खुकुरी र अर्गानिक चिया दिइएको थियो भने कोरियाको तर्फबाट हातद्वार निर्मित चिया कप सेट प्रदान गरेका थिए।

पाँच ‘स’ र एन आर एन ए कोरियाको मुख्य आयोजना रहेको कार्यकमलाई नेपाली राजदूतावासको समन्वय र नेपाली सम्पर्क समितीको सहजिकरण रहेको थियो भने कोरियामा रहेका विभिन्न संस्थाहरु आयोजकमा रहेका थिए। कार्यवाहक राजदूत महामहिम पुष्पराज भट्टराईको प्रमुख आतिथ्य रहेको कार्यक्रमलाई एन आर एन एका अध्यक्ष वुद्धि गुरुङले अध्यक्षता गरेका थिए। कार्यक्रम संयोजक एवं पाँच सका अध्यक्ष विष्णु थापाले आफ्नो अ्मूल्य समय दिएर कार्यक्रमलाई सफल बनाइएको प्रति उपस्थित सबैलाई धन्यवाद ज्ञापन गर्दै आगामी दिनहरुमा पनि साथ र सहयोगको अपेक्षा गरेका थिए।