एनसिसिको सहजिकरणमा सलनालको कार्यक्रम बाँडफाँड, कास्की र खोटाङलाई स्विकृत
कोरियाको नयाँ वर्ष सलनालको अवसरमा आयोजना गरिने सांगितिक कार्यक्रमको बाँडफाँड गरिएको छ। नोभेबर १० तारिख दोङ्देमुन स्थित पूर्वी नेपाल समाजको हलमा भएको एनसिसिको सहजिकरण कार्यक्रम मार्फत कास्की र खोटाङलाई सांगितिक कार्यक्रमको लागि स्विकृति दिइएको हो । कास्की परिवारले सलनालको पहिलो दिन जनवरी २८ र खोटाङ सेवा समाजले २९ तारिखका दिन कार्यक्रम गर्ने सहमति भएको छ।
विगतका वर्षहरुमा संस्थाहरु कार्यक्रम गर्न पाउँ भनी एनसीसीमा निवेदन पेश गर्दथे भने यसपटक देखि प्रदेश स्तरीय संस्थाहरुले प्रदेश मातहतको संस्थाबाट कार्यक्रम बाँडफाँड पछि एनसीसीमा सहजिकरणका लागि निवेदन दिने प्रकृया रहेको छ। एनसिसि र प्रदेश स्तरिय संस्थाहरुको पटक पटक बसेको बैठकले ११ बुँदे सहमति पत्र पनि सार्वजनिक गरेको छ। साथै आवश्यकता अनुसार केहिँ बुँदाहरु थपघट हुनसक्ने भेलाले जनाएको थियो। 
कास्की र खोटाङले एकै दिन अर्थात जनवरी २९ का दिन कार्यक्रमको मिती तोकेका थिए तर लामो छलफल पश्चात सहमति गर्न सकेकोमा दुवै संस्थालाई राम्रो हुने एनसिसि अध्यक्ष हरी खनालले बताएका छन्। साथै “एक आपसमा सहयोग, सदभाव र सबै संस्थालाई मिलाएर लैजानु एनसिसिको दायित्व ” रहेको उनले थपे।
दुवै संस्थाले लाइभ कन्सर्ट गर्ने भनिएतापनि कुन कुन ब्याण्ड / कलाकार आउँछन भन्ने विषयभने खुलाएका छैनन्। कास्की परिवारले गण्डकी प्रदेश समाजबाट र खोटाङ सेवा समाजले पूर्वी नेपाल समाजबाट कार्यक्रम गर्ने अनुमति पाएका हुन्।
