डिसेम्बर २८ मा स्याङ्जा भिरकोट आठथर तमु समाजले कोरियामा ल्होसार मनाउने
स्याङ्जा भिरकोट आठथर तमु समाज दक्षिण कोरियाले “तमु ल्होसार २०८१” कार्यक्रमको आयोजना गरी यही डिसेम्बर २८ तारिक शनिबार सउल दोङ्देमुन स्थित नेपाली थाई रेष्टुरेन्टको हलमा ल्होसार मनाउने भएको छ ।
प्रवासमा रहेपनि तमू (गुरुङ) समुदायको नयाँ वर्ष तथा मौलिक पर्व तमू ल्होसार भव्य रुपले मनाउने प्रचलनलाई कायम राख्दै साँझ ८ बजेदेखि शुरु हुने गरी सो ल्होसार मनाउने तयारी गरेको समाजका अध्यक्ष मनोज गुरुङले जानकारी दिए । यो वर्ष पनि समुदायको वर्ग चक्र अनुसार मुप्रि-ल्हो (गिद्ध वर्ग) लाई विदाई र सप्रि-ल्हो (सर्प वर्ग) लाई स्वागत गर्दै रुपा लगाई स्याई स्याई गरिने, स्याेकैँ (रात्रीभोज), शुभकामना आदानप्रदान तथा विविध साँस्कृतिक कार्यक्रम सहित धुमधामका साथ ल्होसार मनाउने तयारीमा जुटेको संस्थाका सचिव सेकेन्द्र गुरुङले बताए ।
“आत्मीय सद्भाव, अनुशासन र गतिशीलता, मानवीय सहयोग गर्नु हाम्रो अभिभारा” भन्ने मूल नारालाई अनुशरण गर्दै सन् २०१५ मा कोरियामा स्थापित आठथर क्षेत्रको तमू (गुरुङ)हरुको साझा संस्था स्याङ्जा भिरकोट आठथर तमू समाजले सउल दोङ्देमुनमा समाज घर (सेल्टर) समेत सञ्चालनमा ल्याउँदै सेवा प्रदान गरिरहेको छ बताउँदै विभिन्न सामाजिक र परोपकारी कार्यमा समाज अग्रसर रहँदै आइरहेको सन्दर्भ संस्थाका संरक्षक नर कुमार गुरुङले उल्लेख गरे ।
स्याङ्जा भिरकोट आठथर तमु समाज दक्षिण कोरियाद्धारा आयोजित उक्त “तमू ल्होसार कार्यक्रम २०८१” लाई सफल बनाउन विभिन्न उद्धेश्यका साथ कोरियामा रहनुभएका नेपाली दाजुभाई तथा दिदीबहिनीहरुमा गरिमामय उपस्थितिका लागि हार्दिक निमन्त्रणा गरेको छ ।
