कोरियाका लागि पनि निशुल्क हवाई टिकटको पहल गर्छु – मन्त्री गुरुङ
सोल-श्रम तथा रोजगार राज्य मन्त्री टेकबहादुर गुरुङले दक्षिण कोरिया सरकारसंग नेपाली कामदारको लागि निशुल्क हवाई टिकटको प्रस्ताब राख्ने भएका छन् ।
नेपाल र कोरियाबीच रोजगार अनुमति प्रणाली (ईपीएस) को श्रम सम्झौता नबिकरण गर्न अर्को हप्ता सोल आउन लागेका मन्त्री गुरुङले समकक्षी कोरियाली मन्त्री ली की क्वनसंग नेपाली कामदारका लागि निशुल्क हवाई टिकट नेपाल सरकारको नीति भएको अवगत गराउने भएका हुन् ।
मलेसिया र खाडीका छ मुलुकमा निशुल्क हवाई टिकटको प्राबधान लागु गराई सकेका मन्त्री गुरुङले मंगलबार फोनमा बोल्दै भने ‘वैदशिक रोजगारमा गएका नेपाली कामदारका लागि हवाई टिकट रोजगारदाताले नै उपलब्ध गराउने नेपाल सरकारको नीति हो ।’
कोरियामा नेपाल बाहेक अन्य १४ मुलुकबाट कामदार आउने भए पनि निशुल्क हवाई टिकट नेपाल सरकारको नीति रहेको आफुले कोरिया सरकारसंग राख्ने मन्त्री गुरुङले बताए । उनले कोरिया सरकारसंग ईपीएस कोटा बढाउन प्रयास समेत गर्ने बताए ।
मन्त्री गुरुङले कोरिया सरकारसंग आउदो ईपीएस परीक्षाका लागि अनलाईनबाटै आवेदन दिन सकिने ब्यवस्थाको लागि समेत कोरिया सरकारसंग वार्ता गरिने जनाउदै पछिल्लो समय कोरियामा नेपाली कामदार अबैधानिक हुने क्रमलाई न्यून गरेर ईपीएस कोटा बढाउने आफ्नो लक्ष रहेको बताए ।
दुई देशबीच हुने ईपीएस सम्बन्धी श्रम सम्झौता नबिकरणका लागि मन्त्री गुरुङ, बैदेशिक रोजगार बिभागका महानिर्देशक भरतराज सुवेदी, ईपीएस शाखा नेपालका निर्देशक डिल्लीराम बांस्तोला , श्रम तथा रोजगार मन्त्रालयका उपसचिब गीरिजा शर्मा सहित ६ जनाको प्रतिनीधि मण्डल सोल आउन लागेको जनाइएको छ ।
नेपाल र कोरियाबिच ईपीएससम्बन्धी श्रम सम्झौता प्रत्येक दुई वर्षमा नवीकरण हुुदै आएको छ । यसअघि २०१० र १२ मा नवीकरण भएको थियो । तेस्रो नवीकरण गत बर्षको जुलाईमा हुनुपर्ने भए विविध कारणले एक बर्ष लम्बिएको हो ।
यसअघिका श्रम नवीकरणहरूमा नेपाली कामदारको सेवा, सर्तमा कुनै सुधार नगरिएको भए पनि यसपाली नेपालले केही बुंदा नेपाली कामदारको पक्षमा उठान हुने भएका छन् । यसका लागि ईपीएस शाखा नेपालका निर्देशक डिल्ली बास्तोलाको संयोजकत्वमा अध्ययन कार्यटोली गठन गरेर तयार पारिएको २४ पृष्ठ लामो प्रतिवेदन कोरिया सरकारलाई बुझाइएको छ ।
