छुसकमा कोरियाबासी नेपालीलाई मन्त्र ब्याण्डले मन्त्रमुग्ध बनाउने

आशिष थापा  मगर

 
सोल – कोरियामा रहेका संघ-सस्थाहरू मध्ये पुरानो तथा अत्यन्तै क्रियाशील संस्था नेपाल गोरखा परिवार दक्षिण कोरियाले भुकम्प पीडित बालबलिकाहरुको शिक्षाको लागि कोरियन महान् पर्व चुसकको दोस्रो दिन सेप्टेम्बर-२७ तारिखमा ” मनास्लु सांगीतिक सौगात भाग-२ ,मन्त्र लाईभ कन्सर्ट ईन कोरिया” नामक कार्यक्रम आयोजना गर्ने जनाएको छ | उक्त कार्यक्रमको लागी कलाकार छनोट पूर्ण रूपमा सम्पन्न भएको संस्थाले जानकारी दिएको छ |

 
युवापुस्ता माझ परिचित दार्जलिङगे मन्त्र ब्याण्डको बिशेष प्रस्तुति रहने छ | मन्त्रको ”गोर्खालीको छोरो म गोर्खे मेरो नाम, ”आईलाग्ने शत्रुको म गर्छु काम तमाम, ”ईतिहास पल्टाई हेर या पुर्खालाई सोध जितेका छौं संसारलाई , ”वीर वीर वीर गोर्खाली” जस्ता गीत लोकप्रिय छन् | सन् १९९९ मा स्थापना भएको ब्याण्डले अहिलेसम्म पाँचवटा एल्बम बजारमा ल्याईसकेको छ |

बिगत १६ बर्ष देखि गीत संगीतको निम्ति लागिपरेको ब्याण्डमा ब्रिज, दिवास्कर, विनय थापा, प्रज्ञा लामा र भास्कर देवान रहेका छन् । रक फ्लेवरको गीत गाउन पोख्त ब्याण्डले कोरियामा रहेका युबा जमातलाई फ्लोर तताउन बाध्य पार्ने कुरामा दूई मत रहने छैन | साथमा लोक दोहोरी गायक , गायिका दीपसागर थापा मगर र राधिका हमाल पुनले आफ्ना कर्ण प्रिय गीत सुनाउदै दर्शकलाई छमछमी नचाउने छन् | सोहि कार्यक्रममा गण्डक क्षेत्रमा प्रख्यात कौडा नृत्य(लाईभ)को साथमा स्थानीय कलाकारहरूको पनि बजोड प्रस्तुति रहने छ |

 
सङबुक कुमिन यसङ ह्वेग्वानको हलमा हुने कार्यक्रममा कोरियामा रहनु हुने बिभिन्न पेशामा आबद्ध ब्यापारी ,मजदुर , विद्यार्थी , पत्रकार लगायत सम्पूर्ण कोरियाबासी नेपालीहरुमा उपस्थिति भई कार्यक्रम भब्य रुपमा सफल बनाई दिनको निम्ति नेपाल गोरखा परिवार दक्षिण कोरियाले हार्दिक अनुरोध गरेको छ |

पुनश्च – उक्त दिन कोरियामा रहेका कुनै पनि संघ संस्थाले कार्यक्रम नजुदाई दिनको निम्ति संस्थाले आग्रह गरेको छ |