विदेशमा बस्ने नेपालीका लागि रेमिट हाइड्रोको शेयर आउदै
काठमाडौँ – विदेशमा बस्ने नेपालीले शेयर लगानी गर्न पाउने गरी स्थापना गरिएको रेमिट हाइड्रो लिमिटेडले वैधानिकता प्राप्त गरेपछि आयोजना छनौटको चरण शुरु भएको छ । सरकारी स्वामित्वको जलविद्युत् लगानी तथा विकास कम्पनी लिमिटेड (एचआईडीसीएल) को सहायक कम्पनीको रुपमा रेमिट हाइड्रोले १२५ देखि १३० मेगावाट क्षमताको जलविद्युत आयोजनामा २० अर्ब रुपैयाँ सम्म लगानी गर्ने योजना बनाएको छ ।
जलविद्युत् लगानी तथा विकास कम्पनीका प्रमुख कार्यकारी अधिकृत दिपक रौनियारले रेमिट हाइड्रो लिमिटेड कम्पनीको स्थापना गरिएको र एचआईडीसीएलकै बोर्डले रेमिट हाइड्रोको अन्तरिम संचालक समितिको रुपमा काम थालेको बताए । उनले रेमिट हाइड्रो मार्फत निमार्ण गरिने आयोजना छनौट अन्तिम चरणमा रहेको जानकारी दिए । तर रौनियारले रेमिट हाईड्रोले लगानी गर्ने आयोजना बारे खुलाउन चाहेनन , उनले १२५ देखि १३० मेगावाटको आयोजना १९ देखि २० अर्ब रुपैयाँको लगानीमा निमार्ण गर्ने योजनामा रहेको बताए ।
पूर्वी नेपालको ताप्लेजुङको थिङवा र घुम्सा खोलामा १ सय ३० मेगावाटको जलविद्युत आयोजना निर्माण गर्न ‘रेमिट हाइड्रो’ योजनामार्फत विदेशमा रहेका नेपालीहरुको लगानीमा निमार्ण गर्ने बताउदै आएको छ । रेमिट हाइड्रो मार्फत निमार्ण हुने आयोजनामा ५१ प्रतिशत एचआईडीसीएल, २४ प्रतिशत रेमिट्यान्स होल्डस ( विदेशमा बस्ने नेपाली र उनका परिवार ) , १० प्रतिशत स्थानीय बासिन्दा, १५ प्रतिशत सर्वसाधारणलाई सेयर दिने भएको छ । स्थानीय बासिन्दा र सर्वसाधरणलाई दिने सेयरमा ५० प्रतिशत हिस्सा महिलाहरुलाई दिईने पनि रौनियारले बताए ।
यो आयोजनामा लगानी गर्नेले पेन्सन जस्तै बाँचुञ्जेल आकर्षक प्रतिफल पाउने कम्पनीका प्रमुख कार्यकारी अधिकृत दिपक रौनियारले बताए ।
‘यो योजनामा किस्ताबन्दीमा रकम जम्मा गर्न सकिने छ र कम्पनीले आजीबन आकर्षक प्रतिफल दिनेछ,’ रौनियारले भने । रौनियारका अनुसार यो योजनामा सहभागि हुन नेपालमा बैंक खाता हुनुपर्नेछ । श्रमिकहरुले आफूले कमाएको रकम थोरै थोरै गरेर मासिकरुपमा खातामा जम्मा गरी कम्पनीमा सेयर लगानी गर्न पाउने छन ।
