नेपाली टोली यू १९ विश्वकप क्रिकेटका लागि छनोट, फाइनल खेलमा आयरल्याण्ड तीन विकेटले पराजित
सोल – मलेसियास्थित किन्नारा ओभलमा आयरल्याण्ड विरुद्ध तीन विकेटको जीत निकाल्दै नेपालको युवा टोली आगामी वर्ष बंगलादेशमा हुने यू १९ विश्वकपमा छानिएको छ ।
नेपालले १ सय ८५ रनको लक्ष्य अन्तिम २२ बल बाँकी छदैँ ७ विकेटको क्षतिमा भेट्यायो । फाइनल खेलमा टस जितेर पहिले ब्याटिंग थालेको आयरल्याण्डले ४७ ओभर ४ बलमा अलआउट हुनअघि १ सय ८४ रन जोडेको थियो ।
ज्याक टेक्टरलाई चौथो ओभरमा पहिलो विकेटका रुपमा गुमाउँदा केवल ९ रन जोडेको आयरल्याण्ड अर्का ओपनर एडियू अस्टिनले ग्यारी म्याकक्लिनटकसँग मिलेर तेस्रो विकेटका लागि ७६ रनको साझेदारी गर्दा नेपालमाथि दबाब सिर्जना गर्न सफल थियो । तर, तेस्रो विकेटका रुपमा ओपनर अस्टिनलाई १ सय ७ रनको अवस्थामा गुमाएपछि आयरल्याण्डको इनिंग्स केही कमजोर देखियो ।
अस्टिनले ३० ओभर ३ रनमा पेभेलियन छाडे भने म्याकक्लिनटकले ३१ ओभर ६ बलमा पेभेलियन छाडे । मैदानमा मज्जाले जमेका दुई खेलाडी पेभेलियन फर्कादाँसम्म आयरल्याण्ड १ सय ११ रनमा थियो । उनीहरुबीचको साझेदारी भंग भएपछि आयरल्याण्डका बाँकी ब्याटस्म्यान चम्कन सकेनन् । खेलमा अस्टिनले ४४ तथा म्याकक्लिनटनले ४५ रन बटुलेका थिए ।
४७ ओभर आयरल्याण्डबाट लोर्कान टोकरले ३३ तथा विलियम म्याकक्लिनटकले २० रन बटुले । आयरल्याण्डलाई ४७ ओभर ४ बलमा अलआउट गर्ने क्रममा नेपालबाट ललित राजवंशीले सर्वाधिक ४ विकेट लिए । त्यस्तै आरिफ शेखले तीन तथा दिपेन्द्रसिंह ऐरीले २ विकेट लिए । जवाफी ब्याटिंगमा उत्रिएको नेपालले पनि सुरुआतमै विकेट गुमायो ।
मिट्चेलको बलमा सन्दीप सुनार एलबिडल्युको धरापमा पर्नुअघि नेपाल एक ओभर १ बलमा शुन्य रनको अवस्थामा थियो । तर अर्का ओपनर सुनिल धमलाले नेपालको इनिंग्स सम्हाल्दै ४७ रन प्रहार गरे । नेपालबाट कप्तान राजु रिजालले ३५ , आरिफ शेखले २१ तथा दीपेन्द्र सिंह ऐरीले २६ रन प्रहार गरे । यसअघि नेपालले समूह चरणमा पनि आयरल्याण्डसहित सबै देशमाथि जीत दर्ता गरेको थियो ।
