नाकाबन्दीको असर सेयर बजार ३० अंकले घटयो
काठमाडौं । भारतीय नाकाबन्दीले अर्थतन्त्र अस्तव्यस्त भएपछि सेयर बजारमा पनि पहिरो गएको छ । दसैंपछिको दोस्रो कारोबार दिन बजारमा २९.३२ अंकको गिरावट आएको छ । हरियो भएर खुलेको बजार केही मिनेटमै रातो भएपछि पुरानो रंगमा फर्किन पाएन ।
नाकाबन्दीले अर्थतन्त्रलाई अस्तव्यस्त पारेपछि बजारमा त्यसको नकारात्मक असर परेको हो । बैंक तथा वित्तीय संस्थालगायत अन्य कम्पनीहरुले धमाधम आकर्षक लाभांस घोषणा गर्दा बजार बढ्ने गर्थियो तर अहिले नाकाबन्दीले उद्योगधन्दा ठप्प भएको र पुँजी परिचालन हुन नसकेको असर स्टक मार्केटमा देखिएको हो ।
उद्योगधन्दा धेरै भएको तराईमा मधेसी मोर्चाको निरन्तरको आन्दोलन र भारतको नाकाबन्दीका कारण अर्थतन्त्र अस्तव्यस्त भएको छ । दसैंका बेलामा निकै चलायमान हुने बजार यसपाली सुनसान भएकाले पनि अर्थतन्त्रमा पुँजी परिचालन हुन सकेन ।
अर्थतन्त्रमा चौतर्फी असर पर्दा सेयर बजारमा मंगलबार पहिरो गएको हो । कारोबार रकममा पनि उल्लेख्य गिरावट आएको छ ।दिनभरीमा ८३ कम्पनीको २० करोड ७२ लाख रुपैयाँको सेयर कारोवार भएको छ । कुल तीन लाख ६१ हजार ६१६ कित्ता सेयर कारोबार भएका छन् ।
बजारका सबै सुचक ओरालो लागेको छ । सबैभन्दा वढी बिमा ९०.७ अंक, जलविद्युत् ७७.५३, बैंकिङ ३५.९२ अंकले झरेको छ । होटल २२.३१, विकास बैंक १६.७५, फाइनान्स ४.९५ र अन्य ७.०४ अंकले घटेको छ ।
कुल ८३ कम्पनीको सेयर कारोबार भएकोमा जम्मा दुईको मात्र मूल्य बढेको छ । वरुण हाइड्रोको ३५ रुपैयाँ र कर्णाली डेभलपमेन्टको २० रुपैयाँले मूल्य बढेको छ । केही कम्पनीको मूल्यस्थिर रहेपनि अधिकांसको घटेको छ ।
सबैभन्दा वढी एभरेष्ट बैंकको दुई करोड आठ लाखको सेयर कारोबार भएको छ । बैंकको सेयर मूल्य घटेर २७०२ रुपैयाँमा आएको छ । नेपाल इन्भेष्टमेन्टको साधारण एक करोड ५९ लाख, संस्थापक एक करोड ३० लाख रुपैयाँको सेयर कारोबार भएको छ ।
