दुई विषयमा डिग्री गरेका राई किबी खेतीमा , लोभलाग्दो आम्दानी गर्दै
खोटाङ – खोटाङको दोर्पाचिउरीडाँडा–८ का शुभचन्द्र राईले किबीको बिरुवा बिक्री गरेर लोभलाग्दो आम्दानी गर्नु भएको छ । तीन वर्षदेखि किबीको व्यवसायिक नर्सरी सुरु गर्नुभएका राईले वार्षिक पाँच लाखभन्दा बढी आम्दानी गरिरहनुभएको छ ।
सदरमुकाम दिक्तेलनजिक पर्ने नेर्पाको तालखर्कमा २० रोपनी जग्गामा किबी खेती लगाउनु भएका राईले किबीको एउटा बिरुवा ६ सय रुपैयाँसम्ममा बिक्री गर्दैआउनु भएको छ । कानुनमा बिएल तथा समाज शास्त्र र राजनीतिक शास्त्रमा स्नातकोत्तर गर्नुभएका राईले यस वर्ष गोल्डेन, हेवार्ड र रेड प्रजातिका गरी ६ हजार ७ सय वटा किबीका बिरुवा बिक्री गरेको बताउनभयो ।
राईको शुभ कृषि फार्मबाट हेवार्ड प्रजातिको किबीको बिरुवा एउटाको ३ सय ५०, रेड प्रजातीको एउटाको पाँच सय र गोल्डेन प्रजातीको किबीको बिरुवा एउटाको ६ सय रुपैयाँमा बिक्री हुने गरेको छ । फार्ममा उत्पादन भएको बिरुवा नर्सरीबाटै बिक्री हुने गरेको राईले बताउनुभयो ।पछिल्लो समय जिल्लाका कृषक किबी खेतीप्रति आकर्षित बनेपछि आउँदो वर्ष १२ हजार बिरुवा उत्पादन गर्ने तयारी गरेको उहाँले बताउनुभयो ।
फार्मका प्रबन्ध निर्देशक रहेका राईका अनुसार नर्सरीमा उत्पादित किबीको बिरुवा जिल्लाभित्रका सबै गाविस तथा छिमेकी जिल्ला भोजपुरमासमेत निर्यात हुने गरेको छ । विभिन्न क्याम्पसमा अध्यापन तथा वकालतको काम गरेका ४५ वर्षका राईको व्यवसायिक नर्सरी खेतीका कारण स्थानीय तीन युवाले गाउँमै रोजगारीको अवसर पाएका छन् । थोरै लगानीमा धेरै आम्दानी गर्न सकिने भएकाले किबी खेती सुरु गरेको राईको भनाई छ ।
‘तीन वर्ष पहिले रोपेको बिरुवाले यस वर्षबाट फल दिन थालेको छ ।’ पूर्वगाविस अध्यक्ष समेत रहेका राईले भन्नुभयो ‘सुरुबाटै राम्रो फल दिएकाले आगामी दिनमा अझै बढाउने तयारी गरेको छु ।’ राईको फार्ममा किबीसँगै पाउलोनिया, सिताके च्याउ, कुरिलो, स्याउ, नास्पातीका साथै विभिन्न प्रजातिका बिरुवा पनि पाइन्छ ।
