तमु धीँ दक्षिण कोरियाको अधिवेशन तयारी तिब्र हुँदै
सोल कोरिया
तमु धीँ दक्षिण कोरियाले आफ्नो ७औं अधिवेशनको तयारी तिब्र बनाएको छ । अगामी नोभेम्बर २२ तारिकका दिन सोलको सिलसङ्दोङ् स्थित नेपाल हाउसमा अधिवेशन कार्यक्रम हुने उसले जनाएको छ ।
तयारीकै सिलसिलामा गएको छुसकमा सम्पन्न ‘रोधी सांगीतिक सौगात भाग–३, कर्म ब्याण्ड लाईभ कन्सर्ट’ समिक्षा एवं ७औं अधिवेशनको तयारी कार्यक्रम धीँले नोभम्बर ८ मा सम्पन्न गरिसकेको छ ।
सो अवसरमा अधिवेशनका तयारी बारे कोरियाको विभिन्न शहरहरुमा छरिएर रहेका तमुहरुलाई जानकारी गराएकाे संस्थाका अध्यक्ष सुरज गुरुङ्ले जानकारी दिए ।
अधिवेशनको उद्घाटनसत्रका प्रमुख अतिथि कोरियाका लागि नेपाली श्रम सहचारी अनिल गुरुङ्, बिशेष अतिथि जनजाति महासंघका अध्यक्ष चित्र तामाङ् लगायत सम्पूर्ण अतिथिहरुलाई पत्राचार गरिसकिएको पनि गुरुङ्ले जानकारी दिए ।
दिनको ठिक १२ बजे सुरु हुने ७औं अधिवेशनले संस्थालाई नयाँ नेतृत्व प्रदान गर्नुको साथै भावी कार्यनीति समेत तय गर्ने बताईएको छ ।
विश्वभरका तमुहरुलाई एकता गर्ने उद्देश्य सहित सन १९९९ सयमा तमु प्रचार प्रसार समिति नामले सुरु भएको ‘तमु धीँ दक्षिण कोरिया’ हालसम्म विभिन्न सामाजिक सेवाहरु गर्दै आईरहेको छ ।
